काठमाडौं, २३ वैशाख
धनकुटा, धनकुटा नगरपालिका-६ स्थित सडकमा सिधुवाबाट काठमाडौंतर्फ जाँदै गरेको बाग्मती प्रदेश ०१-०२६ च ८७२७ नम्बरको पिकअप गाडी शुक्रबार दिउँसो दुर्घटना हुँदा गाडीमा सवार छथरजोरपाटी गाउँपालिका-६ बस्ने ४० वर्षीय गोबिन्द घिमिरेको मृत्यु भएको छ । दुर्घटनामा गम्भीर घाइते भएका उनको जिल्ला अस्पताल धनकुटा हुँदै धरान घोपामा थप उपचारको क्रममा मृत्यु भएको हो । गाडीका चालकलाई प्रहरीले नियन्त्रणमा लिएको छ ।
सर्लाही, हरिपुर नगरपालिका-४ हरैया चोकमा बिआर ३० ए २७२१ नम्बरको रथको ठक्करबाट पैदलयात्री चन्द्रनगर गाउँपालिका-१ मोहनपुर बस्ने २२ वर्षीय पप्पु बैठाको शुक्रबार राति मृत्यु भएको छ । ठक्करबाट गम्भीर घाइते भएका उनको प्रादेशिक अस्पताल मलंगवामा उपचारको क्रममा मृत्यु भएको हो । साथै उक्त रथले ना.६५ प ४१६० नम्बरको मोटरसाइकललाई समेत ठक्कर दिँदा घाइते भएका मोटरसाइकल चालकको गैर सिर्सिमास्थित ऐपोलो अस्पतालमा उपचार भइरहेको छ । हाल फरार रथका चालकको प्रहरीले खोजी गरिरहेको छ ।
मुस्ताङ, थासाङ गाउँपालिका-१ स्थित सडकमा टुकुचे बगरबाट चोखेपानीतर्फ जाँदै गरेको ग.१ त ६७३६ नम्बरको ट्याक्टर शनिबार बिहान दुर्घटना हुँदा ट्याक्टरका सह-चालक सोही गाउँपालिका-२ खन्ती बस्ने म्याग्दी धौलागिरी गाउँपालिका-३ घर भएका ३३ वर्षीय टकमान बुढा मगरको घटनास्थलमै मृत्यु भएको छ । ट्याक्टर चालकलाई प्रहरीले नियन्त्रणमा लिएको छ ।
दुर्घटनाका सम्बन्धमा प्रहरीले थप अनुसन्धान गरिरहेको छ ।