म्याग्दी। म्याग्दीको उत्तरी क्षेत्र भएर बग्ने कालीगण्डकी नदीमा निर्माण सुरु हुन लागेको मध्य कालीगण्डकी जलविद्युत् आयोजनाका लागि वित्तीय व्यवस्थापन भएको छ। आइएमई समूहको हाइड्रो सपोर्ट प्रालिले म्याग्दीको अन्नपूर्ण गाउँपालिकामा निर्माण गर्न लागेको ६६ दशमलव ३ मेगावाट क्षमताको आयोजनामा नबिल बैंकको अगुवाइमा ६ वाणिज्य बैंकले ९ अर्ब १२ करोड रुपैयाँ लगानी गर्ने भएका हुन्।
हाइड्रो सपोर्ट प्रालि प्रवर्धक रहेको यस आयोजनाको बाँध अन्नपूर्ण-३ सुकेबगरमा र विद्युत् गृह अन्नपूर्ण-२ ठूलोबगर क्षेत्रमा प्रस्ताव गरिएको छ। ४ सय मिटर सुरुङ रहने यस आयोजनाको विद्युत्गृहदेखि फोरवेको उचाइ १ सय १५ मिटर हुनेछ।
केही दिनअघि नबिल बैंकको नेतृत्वमा वित्तीय व्यवस्थापनको सम्झौता भएको मध्य कालीगण्डकीको पूर्वाधार निर्माणको तयारी गरेको आयोजना प्रमुख चन्द्र ढकालले जानकारी दिए। सन् २०२४ मा भौतिक निर्माण सुरु हुने आयोजना ४ वर्षमा सम्पन्न गर्ने लक्ष्य राखिएको छ।
सम्झौतामा हाइड्रो सपोर्ट प्रालिको तर्फबाट आइएमई समूहका अध्यक्षसमेत रहेका ढकाल र बैंकहरूको तर्फबाट सहवित्तीयकरणको नेतृत्व गरेको नबिल बैंकका प्रमुख कार्यकारी ज्ञानेन्द्र ढुङ्गानाले हस्ताक्षर गरेका थिए।
कुल १२ अर्ब ९३ करोड रुपैयाँ लागत अनुमान गरिएको यस आयोजनामा ७५ प्रतिशत लगानी नबिलसहित एभरेस्ट बैंक लिमिटेड, नेपाल इन्भेस्टमेन्ट मेगा बैंक, नेपाल बैंक लिमिटेड, राष्ट्रिय वाणिज्य बैंक र प्रभु बैंकले गर्ने भएका छन्। २५ प्रतिशत प्रवर्धक र शेयर लगानीकर्तामार्फत जुटाइने भएको छ।
नबिल बैंकले ३ अर्ब १२ करोड रुपैयाँ, एभरेस्ट बैंक र नेपाल इन्भेस्टमेन्ट मेगा बैंकले २/२ अर्ब रुपैयाँ र नेपाल बैंक, राष्ट्रिय वाणिज्य बैंक र प्रभु बैंकले १/१ अर्ब रुपैयाँ लगानी गर्नेछन्। नेपाल विद्युत् प्रधिकरणसँग विद्युत् खरिद बिक्री सम्झौता हुँदा हिउँदयामको विद्युत् खरिद दर ८.४० रुपैयाँ र वर्षायामको दर ४.८० रुपैयाँ कायम भएको आधारमा आयोजनाबाट हिउँदमा १ सय ३० गिगावाटबाट १ अर्ब ९ करोड रुपैयाँ र वर्षामा २ सय ७७ गिगावाटबाट १ अर्ब ३३ करोड रुपैयाँ आम्दानी हुने प्रक्षेपण छ।
मुस्ताङदेखि पर्वतको सिमानासम्मको म्याग्दी खण्डमा कालीगण्डकी नदीबाट ५ वटा जलविद्युत् आयोजना निर्माणको तयारी भएको छ। यी आयोजना निर्माणको तयारीसँगै कालीगण्डकी ऊर्जा नदीमा रुपान्तरण हुन लागेको छ। घाँसादेखि मिलनचोकसम्म कालीगण्डकीमा करिब ४ सय मेगावाट क्षमताका जलविद्युत् आयोजना निर्माणको प्रक्रियामा छन्।