टेलिभिजन रियालिटी शो महा गफाडी घोषणा गरिएको छ।
वाककलामा आधारित यस कार्यक्रममार्फत बोल्न जान्ने र बोलेरै जीवनमा केही गर्छु भन्नेहरूलाई अवसर दिइने निर्देशक नरेशनाथ योगीले घोषणा गरेका हुन्।
उनले भने, ‘कतिले सजिलै गफाडी उपमा पनि दिँदै आएका छन्। तिनै गफाडी, वाककलाका धनीहरूको खोजी गर्ने एक नवीन प्लेटफर्म हो महा गफाडी।’
यो कार्यक्रममा संसारभर रहेका नेपालीभाषी तथा नेपाली नागरिकले सहभागिता जनाउन सक्नेछन्।
कार्यक्रमको निर्णायकका रूपमा कलाकार शैलेन्द्र सिम्खडा, अभिनेत्री लुनिभा तुलाधर र अभिनेता बुद्धि तामाङ छन्। कार्यक्रम अभिनेता कामेश्वर चौरसियाले सञ्चालन गर्नेछन्।
आफ्ना ज्ञान, गफप्रतिको ध्यान र गफको विज्ञानमार्फत आफूलाई महागफाडीको दाबेदारका रूपमा प्रस्तुत गर्ने कार्यक्रमका विजेताले नगद १५ लाख र कार, उपविजेताले नगद १० लाख र सवारीसाधन तथा तृतीय हुनेले नगद ५ लाख र सवारीसाधन प्राप्त गर्नेछन्।