बाह्रखरी अनलाईन मिडियाले काठमाडौंमा पत्रकार सम्मेलन गरी पाँचौँ ‘डिश होम बाह्रखरी कथा लेखन प्रतियोगिता–२०८०’ लागि कथा आह्वान गरेको छ ।
पत्रकार सम्मेलनमा प्रतियोगितामा सर्वोत्कृष्ट तीन कथालाई अघिल्ला वर्षहरूमा जस्तै क्रमशः एक लाख, ६० हजार र ४० हजार रुपैयाँ नगद राशिका साथ पुरस्कार तथा प्रमाणपत्र प्रदान गरिने जनाइएको छ ।
कथा प्रतियोगिताको लागि यो सर्वाधिक राशीको पुरस्कार हो । पत्रकार सम्मेलनमा जनाइए अनुसार प्राप्त हुने सबै कथाहरूलाई पहिलो चरणमा बाह्रखरीका विचार सम्पादक गोविन्द अधिकारीको संयोजकत्वको आन्तरिक समूहले ५० कथा
छनौट गर्नेछ र निर्णायक समूहलाई हत्तान्तरण गर्नेछ । निर्णायक समूहले प्रथम, द्वित्तय तथा तृतिय छनौट गर्नुकला साथै उत्कृष्ट २२ समेत छनौट गर्नेछ । विगतका वर्षहरुमा झै यो वर्ष पनि २२ उत्कृष्ट कथाकारले सम्मानस्वरुप ५ हजार पाउनेछन् ।
निर्णायक समूहको संयोजकमा समीक्षक प्रा.डा.सावित्री कक्षपति तथा सदस्यहरुमा कथाकार महेशविक्रम शाह र उपन्यासकार सुविन भट्टराई रहेका छन् ।
गत बर्षदेखि शुरु भएको स्थापित कथाकारहरूबाट प्राप्त गरिने पाँच कथाहरू यस वर्ष पनि पनि समावेश गरिनेछ । यस वर्षको लागि कथाकारहरु भाउपन्थी, भागिरथी श्रेष्ठ, सीता पाण्डे, डा.राजेन्द्र विमल तथा गणेश रसिकले कथा उपलब्ध गराउन सहमति जनाएको बताइएको छ ।
कथा प्रतियोगिताको प्रथम संस्करणमा बिना थिङ तामाङको ‘ब्याड भाले’ प्रथम, लक्ष्मण वियोगीको ‘टाउको’ द्वितीय र सुमित्रा न्यौपानेको ‘बार्दली’कथा तृतीय भएको थियो । दोस्रो संस्करणमा मुना चौधरीको ‘लार’ प्रथम, श्रेयज सुवेदीको ‘बेजोडा’ द्वितीय र दीपेन्द्र दोङ तामाङको ‘बुलेट बाइक’ तृतीय, तेस्रो संस्करणमा मनोजादित्य न्यौपानेको ‘अन्तिम अतिथि’ प्रथम, स्वप्निल नीरवको ‘बूढो घर’ द्वितीय र रेणुका जिसीको ‘मुडुली’ तृतीय तथा चौथो संस्करणमा नवीन अभिलाषीको कथा ‘दमाहा’ प्रथम, रमेशजंग थापाको ‘डढेको आकाश’ द्वितीय र रुमु न्यौपानेको ‘घूँघट’ तृतीय भएको थियो ।
शुरुका वर्षहरुमा बाह्रखरी मिडियाले प्रतियोगितामा उत्कृष्ट रहेका कथाहरुको पुस्तक आफैं प्रकाशन गर्ने गरेकोमा गत बर्षदेखि नीजि क्षेत्रको अग्रणी प्रकाशक फाइन प्रिण्ट सँगको सहकार्यमा प्रकाशन थालेको छ र यो बर्ष पनि त्यसले निरन्तरता पाउनेछ ।
कोरोना महामारीका कारण एक वर्ष भने डिजिटल कपी मात्र प्रकाशन गरिएको थियो, मुद्रित पुस्तक प्रकाशन गरिएको थिएन ।
कथा प्रतियोगीहरूले २०८० असोज ३० गतेसम्म कथा पठाउन सकिने समेत पत्रकार सम्मेलनमा जनाइएको छ ।