जावेद अख्तरको मानहानि मुद्दामा कङ्गना रनौतको समस्या बढ्दै गएको देखिन्छ। मुम्बई अदालतबाट अभिनेत्रीलाई गैर जमानती वारेन्ट पठाउन सकिने जनाएको छ।
उनी पक्राउ गर्न सकिने भएको भारतीय समाचार माध्यमले जनाएका छन्। यसअघि अदालतले कङ्गनालाई मुद्दाको सुनुवाइमा उपस्थित हुने अन्तिम मौका दिएको थियो । अदालतले कङ्गना रनौत अझै पनि अदालतमा नआएमा उनलाई गैर जमानती वारेन्ट पठाइने स्पष्ट पारेको छ। कङ्गना रनौत जावेद अख्तरसँग लामो समयदेखि चलिरहेको मानहानि मुद्दालाई समाधान गर्न मध्यस्थता बैठकमा सहभागी भएकी छैनन्।
यस्तो अवस्थामा हालै मुम्बईको एक अदालतले अभिनेत्री विरुद्ध गैर जमानती वारेन्ट जारी गर्नु अघि अन्तिम मौका दिएको छ। कङ्गनाका वकिल रिजवान सिद्दिकीले बान्द्रा अदालतलाई भने कि उनी संसद्को काममा व्यस्त थिइन र जसका कारण सुनुवाईमा उपस्थित हुन नसकेकी हुन्। कङ्गना रनौत सुनुवाईमा उपस्थित नभएको कारण जावेत अख्तरका वकिल जय के भारद्वाजले निवेदन दिएका थिए। कंगनाविरुद्ध गैर जमानती वारेन्ट जारी गर्न माग गरिएको थियो।
भारद्वाजले करिब ४० वटा पेशीमा अदालतको सुनुवाइमा अभिनेत्री उपस्थित नभएको दाबी गरेका थिए। अदालतले कङ्गनाका वकिललाई निवेदनको जवाफ पेश गर्न निर्देशन दिएको छ तर वकिलले गैर जमानती वारेन्टको विरोध गरेका छन्। यस्तो अवस्थामा मजिस्ट्रेटले अभिनेत्रीलाई अन्तिम मौका दिने निर्णय गरेका हुन। मार्च २०१६ मा जावेद अख्तरको घरमा बैठक भएको थियो। यसै क्रममा कङ्गना रनौत र ऋतिक रोशन इमेलका कारण चर्चामा थिए।
रोशन परिवारका नजिकका जावेद अख्तरले कङ्गनासँग भेटघाट गर्ने जिम्मेवारी लिए र अभिनेत्रीलाई रोशनसँग माफी माग्न भनेका थिए। त्यसबेला कंगनाले कुनै जवाफ दिएकी थिइनन् तर २०२० मा सुशान्त सिंह राजपुतको कथित आत्महत्यापछि अभिनेत्रीले एक अन्तर्वार्तामा जावेद अख्तरसँगको २०१६ मा भएको भेटको उल्लेख गरेकी थिइन्।
यस क्रममा जावेद अख्तरले कङ्गनाबाट अपमानजनक शब्द पाए र उनले अभिनेत्री विरुद्ध मानहानिको मुद्दा दायर गरेका थिए । एजेन्सी ।