काठमाडौं, १२ मंसिर
बर्दिया, बढैयाताल गाउँपालिका-७ कर्णालीपुरबाट अवैध लागूऔषध ब्राउनसुगर जस्तो देखिने पदार्थ ३ ग्राम १ सय ९० मिलिग्राम सहित २ जनालाई आइतबार राति प्रहरीले पक्राउ गरेको छ । पक्राउ पर्नेहरूमा मधुवन नगरपालिका-८ बस्ने २४ वर्षीय कृष्ण थारु र २५ वर्षीय गणेश चौधरी रहेका छन् । प्रहरी चौकी कालिकाबाट खटिएको प्रहरीले भे.१२ प ६३७९ नम्बरको मोटरसाइकललाई जाँच गर्ने क्रममा मोटरसाइकल चालक कृष्ण र मोटरसाइकलमा सवार गणेशलाई उक्त पदार्थ सहित फेला पारी पक्राउ गरेको हो ।
सर्लाही, बरहथवा नगरपालिका-९ बाट अवैध लागूऔषध गाँजा करिब ५ केजी सहित गोडैता नगरपालिका-१० सिसौटिया बस्ने ३० वर्षीय प्रमोद सहनीलाई आइतबार राति प्रहरीले पक्राउ गरेको छ । उक्त स्थानमा बा.४० प ५५८६ नम्बरको मोटरसाइकल र बा.८ प २२८९ नम्बरको मोटरसाइकल एकआपसमा ठक्कर खाई दुर्घटना भएको खबर प्राप्त हुनासाथ खटिएको प्रहरीले मोटरसाइकल जाँच गर्ने क्रममा बा.८ प २२८९ नम्बरको मोटरसाइकलको सिटभित्र लुकाई छिपाई ल्याएको उक्त गाँजा फेला पारी उक्त मोटरसाइकलका चालक प्रमोदलाई पक्राउ गरेको हो । उक्त दुर्घटनामा घाइते भएका प्रमोद समेत ३ जनाको एडभान्स सनजिवनी अस्पताल बरहथवामा उपचार भइरहेको छ ।
यस सम्बन्धमा प्रहरीले थप अनुसन्धान गरिरहेको छ ।