तेल अभिभ । गत हप्ता चरमपन्थी समूह हमास गरेको आक्रमणका क्रममा बन्धक बनाइएका केही इजरायलीको शव शुक्रबार सेनाले गरेको जमिनी कारबाहीका क्रममा बरामद गरिएको त्यहाँको सञ्चारमाध्यमले जनाएका छन् ।
हारेत्ज र जेरुसेलम पोस्टले इजरायली डिफेन्स फोर्सले फेला पारेको शव इजरायलमा फर्काउने तयारी गरिरहेको उल्लेख गरेको छ । यद्यपि, शवको संख्या भने खुलाइएको छैन ।
यता, इजरायली डिफेन्स फोर्सका अनुसार हाल गाजामा हमासले अझै १२० जना सर्वसाधारणलाई बन्धक बनाइरहेको छ । सामाजिक सञ्जाल एक्सबाट आईडीएफले यसबारे जानकारी दिएको हो ।
इजरायली सेनाले गाजा क्षेत्रमा जमिनी कारबाही सुरु गरेको छ । इजरायली सेनाले गाजामा ‘आतंकवादी अड्डाहरू र पूर्वाधारहरू नष्ट गर्न’ गाजामा छापा मारेको बताएको छ। इजरायली सेनाले पनि बन्धकहरूलाई राखिएको ठाउँहरूको पहिचान गर्न मद्दत गर्ने जानकारी सङ्कलन गरेको जनाएको छ।