नेपालमै पहिलोपटक आयोजना गरिएको सङ्गीत प्रतियोगिताका विजेताहरुलाई पुरस्कृत गरिएको छ । आज राजधानीमा आयोजित एक समारोहमा डिजिटल सङ्गीत प्रतियोगिताका उत्कृष्ट ५ जनालाई प्रमाणपत्र प्रदान गरियो भने सर्वोत्कृष्ट १ जनालाई नगद रू. ५० हजार सहित सम्मान गरिएको छ ।
केही महिना अघि प्रसाईसन इन्टरटेनमेन्टले आह्वान गरेको ‘राष्ट्रव्यापी प्रसाईसन सङ्गीत प्रतियोगिता’ मा देशभरिबाट २६ जना सङ्गीत विधाका प्रतिभाहरुले भाग लिएका थिए । गीतकार तथा गजलकार चन्द्र प्रसाईं ‘परिष्कृत’ को शब्दमा रहेको गीत `म आफैं रुझें कि जोवनले रुझायो´ लाई सङ्गीत भरेर पठाएका २६ प्रतियोगी मध्ये उदयपुरका इन्द्र आर.पी., सङ्खुवासभाका केशव अधिकारी, चितवनका जी.बी. सुनार, सुनसरीका पासङ तामाङ र बाँकेका सुजन थारु उत्कृष्ट ५ मा परेका थिए भने ५ मध्येबाट चितवनका जी.बी. सुनार प्रथम भएका हुन् ।
प्रतियोगितामा प्रथम भएका सङ्गीतकारलाई नगद रू.५० हजार सहित प्रमाणपत्र प्रदान गरिएको थियो । समारोहमा गीतकार चन्द्र प्रसाई ‘परिस्कृत’ ले अमेरिकाबाट पठाएको भिडियो सन्देश समेत प्रदर्शन गरिएको थियो । सन्देशमा उनले सबैलाई धन्यवाद दिँदै यस प्रकारको प्रतियोगिता वार्षिक रूपमा आयोजना गर्ने कुरा समेत जानकारी गराएका थिए ।
सङ्गीत प्रतियोगिताको निर्णायकमा वरिष्ठ गायक आनन्द कार्की, विश्व कीर्तिमानी सङ्गीतकार सन्तोष श्रेष्ठ र लोकप्रिय गायिका प्राश्ना शाक्य रहेका थिए । पुरस्कार वितरण समारोहमा प्रमुख अतिथि वरिष्ठ कवि / गीतकार दिनेश अधिकारी, विशिष्ट अतिथि नेपाल पत्रकार महासङ्घका अध्यक्ष विपुल पोखरेल, लेखक / निर्देशक मोहन निरौला, वरिष्ठ कलाकार उत्तम के.सी., अग्रज पत्रकार तुलसी गिरी ‘भावुक’, सानुकाजी श्रेष्ठ, चलचित्र पत्रकार सङ्घका उपाध्यक्ष जीवन पराजुली, म्युजिक भिडिओ निर्देशक समाजका उपाध्यक्ष देवेन्द्र पाण्डे, कवि / निर्देशक हेमप्रभास र निर्णायकहरू वरिष्ठ गायक कार्की, विश्व कीर्तिमानी सङ्गीतकार सन्तोष श्रेष्ठ र लोकप्रिय गायिका प्राश्ना शाक्य आदिको उपस्थिति रहेको थियो