काठमाडौँ । पछिल्लो समयका चर्चित तथा सफल फिल्म जोडी हुन् अभिनेता दयाहाङ राई र अभिनेत्री मिरुना मगर । यो जोडीको लगातार तीन फिल्म हिट भएको छ । त्यसैले पनि यो जोडीलाई लिएर फिल्म निर्माण गर्नेको ताँती छ अहिले ।
यस्तैमा दयाहाङ र मिरुनालाई जोडीको रूपमा लिएर फिल्म ‘लोकल हिरो’ निर्माण हुने भएको छ । निर्माता सरोज न्यौपानेले दयाहाङ र मिरुनालाई मुख्य भूमिकामा अनुबन्धित गर्दै फिल्म निर्माण घोषणा गरेका हुन् । फिल्मको नाम चलचित्र विकास बोर्डमा दर्ता समेत भैसकेको छ ।
रोमान्टिक, कमेडी तथा सामाजिक कथामा बन्ने यो फिल्म विश्वास तिमल्सिना र राज ऋषिले मिलेर निर्देशन गर्दैछन् । यी दुईले बलिउडका केही ठूला फिल्ममा काम गरेको बताइन्छ ।
तिहारलगतै छायाङ्कन सुरु फिल्म काठमाडौँ, काभ्रेपलान्चोक र झापामा छायाङ्कन हुनेछ । फिल्मलाई आगामी फागुनको २५ गतेबाट रिलिज गर्ने योजना निर्माण युनिटको छ ।