काठमाडौं, १३ असोज
सुनसरी, ईटहरी उपमहानगरपालिका-१७ कान्छीचोक चतरा सडकमा को.२ च ८४४ नम्बरको पिकअप गाडीको ठक्करबाट साइकलयात्री रामधुनी नगरपालिका-३ बस्ने ६३ वर्षीय चन्द्र राज दाहालको बुधबार राति मृत्यु भएको छ । ठक्करबाट गम्भीर घाइते भएका उनको उपचारको लागि धरान घोपातर्फ लैजाने क्रममा बाटोमै मृत्यु भएको हो । गाडी चालकलाई प्रहरीले नियन्त्रणमा लिएको छ ।
पाँचथर, फिदिम नगरपालिका-४ साल्बारीस्थित सडकमा माझीटारबाट फिदिमतर्फ जाँदै गरेको को.४ प ८९९९ नम्बरको मोटरसाइकल आफै अनियन्त्रित भई बुधबार दिउँसो दुर्घटना हुँदा मोटरसाइकल चालक कुम्मायक गाउँपालिका-२ कात्तिके बस्ने २४ वर्षीय भिम बहादुर माझीको मृत्यु भएको छ । दुर्घटनामा गम्भीर घाइते भएका उनको जिल्ला अस्पतालमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकलमा सवार १ जनाको सोही अस्पतालमा उपचार भइरहेको छ ।
जुम्ला, हिमा गाउँपालिका-१ आचार्यलीस्थित सडकमा गोठिज्यूलाबाट स्याउ लोड गरी सुर्खेततर्फ जाँदै गरेको बा.प्र ०३००१ ख २१६४ नम्बरको ट्रक साईड दिने क्रममा सडकबाट करिब ५ सय मिटर तल खसेर बुधबार राति दुर्घटना हुँदा ट्रक चालक मकवानपुर बस्ने ३६ वर्षीय अविनाश लामाको घटनास्थलमै मृत्यु भएको छ । साथै दुर्घटनामा घाइते भएका ट्रकका सह-चालकलाई उपचारको लागि कर्णाली स्वास्थ्य विज्ञान प्रतिष्ठान जुम्ला पठाइएको छ ।
दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।