२०७८ सालको जगदम्बा- श्री तथा मदन पुरस्कार समर्पण समारोह कमलमणि थिएटर, पाटनढोकामा आयोजना गरियो । यस कार्यक्रममा जगदम्बा- श्रीद्वारा सम्मानित साहित्यसेवी दुर्गाप्रसाद श्रेष्ठ र मदन पुरस्कार सम्मानित अग्निका लेखक डा. नवराज लम्साललाई गुठीका अध्यक्ष कुन्द दीक्षितले सम्मानपत्र र पुरस्कार राशि अर्पण गरेका थिए । दुवै पुरस्कारको राशि चार/चार लाख रहेको छ ।
श्रेष्ठले नेपाली पहिलो चलचित्र ‘आमा’निर्माण गर्दाको रोचक प्रसङ्ग साझा गर्नु भएको थियो । भारतको बनारसबाट प्रकाशन हुने साहित्यिक पत्रिका उदयका सम्पादक श्रेष्ठले संस्थापक सम्पादक काशीबहादुर श्रेष्ठको स्मरण गर्नु भएको थियो । मदन पुरस्कार सम्मानित अग्निका लेखक डा. नवराज लम्सालले सो समारोहमा पुरस्कृत भएर उभिन पाउनु उहाँको लेखक जीवनकै सर्वाधिक खुशी र आनन्दको क्षण भएको बताउनु भएको थियो ।
काठमाडौँ विश्वविद्यालयका संस्थापक उपकुलपति डा. सुरेशराज शर्माले विद्वत् प्रवचन दिनुभएको थियो । काठमाडौँ विश्वविद्यालय स्थापना बेलाको क्षण र उद्देश्यमाथि पनि उहाँले प्रकाश पार्नुभएको थियो ।