काठमाडौँ : नाटक ‘अग्निचक्षु’ यही जेठ १६ गतेदेखि काठमाडौँको बत्तीसपुतलीस्थित शिल्पी थिएटरमा मञ्चन हुने भएको छ।
साइलेन्ट एक्टको प्रस्तुतिमा मञ्चन हुने यो नाटक जीवित देवी कुमारीको विषयमा आधारित छ।
संस्कृतिभित्र लुकेका धार्मिक, सामाजिक, ऐतिहासिक तथा जीवन दर्शन समेटेर नाटक तयार भएको लेखक चन्द्रप्रसाद पाण्डेयले बताए।
“कला र संस्कृति राष्ट्रको अमूल्य सम्पत्ति हो। यसको संरक्षण गर्नु हामी सबैको दायित्व हो। राज्य तथा नारी शक्ति पुञ्जको रूपमा कुमारीलाई सबैले मान्दै आएको परम्परा नेपालको धरोहर सम्पदा हो‚’ उनले भने‚ ‘गौतम बुद्धको जन्मथलो, विश्वको सर्वोच्च शिखर सगरमाथाको देश अनि जीवित देवी कुमारी पुज्ने देशको रूपमा नेपाल विश्वमा परिचित छ, त्यसैले पनि संस्कृतिमाथि काम गर्ने क्रममा हामीले यस पटक यो विषयमा नाटक तयार पारेका हौँ।”
नाटकका परिकल्पनाकार तथा निर्देशक झकेन विसी कुमारीको ऐतिहासिक विषयवस्तुमाथि नाटक प्रदर्शन गर्न पाउँदा आफूलाई धेरै खुशी लागेको बताउँछन्।
नाटकमा मञ्जु श्रेष्ठ, सङ्गीता उराँव, हेना नगरकोटी, कृष्णभक्त महर्जन, सविन कट्टेल, श्रीशेष श्रेष्ठ, धिरज थापा मगर, शान्ता प्रजापति, राजेन्द्र डंगोल, चक्रप्रसाद पोखरेललगायतले अभिनय गरेका छन्।
सङ्गीत परिकल्पना तथा संयोजन अनुप तिमिल्सिनाको रहेको छ भने अनुपसँगै प्रत्यक्ष सङ्गीतमा शर्मिला गुरुङ, इन्द्रमान महर्जन, प्रतीक प्रजापति रहेका छन् भने कोरियोग्राफी जेडी तमुको रहेको छ।