पर्सा — २०८० को नारायणी वाङ्मय पुरस्कार साहित्यकार गोपाल अश्कको कृति ‘कालो गुलाफ’ ले पाएको छ । नारायणी वाङ्मय प्रतिष्ठानले शनिबार वीरगन्जमा आयोजित आदिकवि भानुभक्त आचार्यको २ सय ११ औं जन्मजयन्ती समारोह एवम् नारायणी वाङ्मय कृति पुरस्कार वितरण कार्यक्रमका साहित्यकार अश्कलाई नगद २५ हजार राशीको उक्त पुरस्कार प्रदान गरेको हो ।
साहित्यिक कार्यक्रम तथा कार्यक्रममा साहित्यकार गोपाल अश्क (दाहिने) लाई नारायणी वाङ्मय पुरस्कार वितरण गरिँदै । तस्विर : शंकर आचार्य / कान्तिपुर
समारोहमा प्रमुख अतिथि वरिष्ठ समालोचक प्राध्यापक केशव रेग्मीले साहित्यकार अश्कलाई सम्मान पत्रसहित पुरस्कार हस्तान्तरण गरेका थिए । २०८० सालभरी प्रकाशन भएका तत्कालीन नारायणी अञ्चलका मकवानपुर र चितवन तथा मधेश प्रदेशका ८ गरी १० वटा जिल्लाबाट पुरस्कारका लागि कृति माग गरिएको थियो । जसमा ५ वटा कृति प्राप्त भएको र मूल्यांकन समितिले कालो गुलाफलाई पुरस्कृत गर्ने निर्णय गरेको हो ।
पुरस्कार ग्रहण गर्दै भाषा आयोगका सदस्यसमेत रहेका पुरस्कृत साहित्यकार गोपाल अश्कले पुरस्कारले आफूलाई उर्जा प्राप्त भएको बताउँदै साहित्यकर्ममा लाग्न थप प्रेरित समेत गरेको बताए । कार्यक्रमलाई सम्बोधन गर्दै प्रमुख अतिथि वरिष्ठ समालोचक प्राध्यापक रेग्मीले भोजपुरी भाषीको बाहुल्यता भएको वीरगन्जमा नेपाली भाषाका अब्बल एवम् उत्कृष्ट कृति यहाँकै साहित्यकारहरुलेरचना गरेको स्मरण गरे ।
कृति मूल्यांकन समितिका सदस्य नवराज रिजालले ३८ वर्षमा प्रतिष्ठानले करिब ४० जनालाई पुरस्कृत गरेको बताए । प्रतिष्ठान सक्रिय भएसँगै यसले यहाँका अन्य साहित्यकार तथा लेखकलाई पनि ऊर्जा थपिएको उनले बताए । वीरगन्जको ज्ञानदा एकेडेमीका प्रमुख कार्यकारी अधिकृत राजेन्द्रप्रसाद कोइरालाले साहित्य र संस्कृति नबुझेका व्यक्तिहरु क्रुर हुने भएकाले साहित्य र संस्कृतिले व्यक्तिलाई नम्र तथा सभ्य बनाउने बताए । साहित्यकार गणेशप्रसाद लाठले पछिल्लो समयमा वीरगन्जमा पुनः साहित्यिक गतिविधि बढ्दै गएकोमा खुशी व्यक्त गर्दै यसले नया पुस्तालाई पनि साहित्यतर्फको अभिरुची बढ्दै गएको बताए ।
प्रतिष्ठानका अध्यक्ष विश्वम्भर शर्माले साहित्य क्षेत्रमा कलम चलाउनेलाई सम्मान गर्ने र नवसाहित्यकारलाई प्रेरित गर्ने अभिप्रायले प्रतिष्ठान प्रयासरत रहेको बताए ।
सोही अवसरमा आयोजित अन्तरविद्यालय कविता प्रतियोगिता विजेता विद्यार्थीलाई पनि पुरस्कृत गरिएको थियो । जसमा गौतम माविकी छात्रा रुबी यादव प्रथम, रविनाथ चौहान द्वितिय, झरनाकुमारी महरा तृतीय भएका थिए ।
यसअघि शुक्रबार बिहान भानु जयन्तीकै अवसरमा प्रभातफेरी निकालिएको थियो । वीरगन्जको भानु चोकस्थित भानुभक्तको सालिकमा मार्ल्यापण गरेर घण्टाघर हुँदै माइस्थान, आदर्शनगर भएर मकालु होटलमा पुगेर प्रभातफेरी साहित्यिक कार्यक्रममा परिणत भएको थियो ।