ग्रामी अवार्ड विजेता भारतीय तबलावादक उस्ताद जाकिर हुसैनको ७३ वर्षको उमेरमा आइतबार निधन भएको छ।
स्वास्थ्यमा समस्या देखिएपछि उनलाई संयुक्त राज्य अमेरिकाको सान फ्रान्सिस्कोस्थित एक अस्पतालमा भर्ना गरिएको थियो। हुसेनको उपचारका क्रममा निधन भएको उनको पारिवारिक स्रोतले पुष्टि गरेको छ।
एक शिक्षकको रूपमा हुसैनको कामले अनगिन्ती संगीतकारहरूमा अमिट छाप छोडेको छ। उनी भारतीय सांस्कृतिक विरासत बोकेका महान संगीतकार थिए।
भारतीय प्रधानमन्त्री नरेन्द्र मोदी, विपक्षी नेता राहुल गान्धीलगायतका नेताले हुसैनको निधनप्रति दुःख व्यक्त गरेका छन्।। उनीप्रति श्रद्धा प्रकट गर्दै प्रधानमन्त्री मोदीले सामाजिक सञ्जाल एक्समा शेयर गरेको पोस्टमा भनिएको छ, ‘उहाँ एक सच्चा प्रतिभाशाली व्यक्ति हुनुहुन्थ्यो। उस्ताद जाकिर हुसैनले भारतीय शास्त्रीय संगीतको दुनियाँमा क्रान्ति ल्याउनुभएको थियो। देशले उहाँ र उहाँको सङ्गीतप्रतिको योगदानलाई सधैँ सम्झिरहनेछ।’
सङ्गितज्ञ हुसैनले भारत सरकारबाट पद्मश्री (१९८८) र पद्म भूषण (२००२), विश्व सङ्गीतमा योगदानको लागि चार पटक ग्रामी पुरस्कार, भारतीय शास्त्रीय सङ्गीतमा उत्कृष्टतालाई मान्यता दिने सङ्गीत नाटक एकेडेमी पुरस्कार, अमेरिकामा परम्परागत कलाकारहरूको लागि सर्वोच्च पुरस्कार ‘नेशनल हेरिटेज फेलोशिप’सहित धेरै प्रतिष्ठित पुरस्कारहरू प्राप्त गरेका छन्।