काठमाडौं– वरिष्ठ पत्रकार कमल कोइरालाको ८७ वर्षको उमेरमा निधन भएको छ ।
पूर्व सांसद् तथा पूर्वराजदूत समेत रहनुभएका कोइरालाको सिनामंगलस्थित केएमसी अस्पतालमा निधन भएको हो । उपचारको लागि अस्पतालमा भर्ना हुनुभएका कोइरालाको उपचारका क्रममा आइतबार साँझ निधन भएको हो ।
केही दिनअघि घरमै लडेका कोइरालालाई उपचारका लागि केएमसी भर्ना गरिएको थियो । पूर्वप्रधानमन्त्री मातृकाप्रसाद कोइरालाका छोरा कमल दक्षिण कोरियाका लागि नेपाली राजदूत समेत हुनुभएको थियो ।
कोइराला परिवारका एक मात्र कम्युनिष्ट र वामपन्थी विचारधारामा विश्वास राख्ने उहाँले लामो समय पत्रकारिता तथा स्तम्भ लेखन गर्नुभएको थियो ।
कोइरालाको सोमबार बिहान ११ बजे नेकपा एकीकृत समाजवादीको कार्यालयमा अन्तिम श्रद्धाञ्जली कार्यक्रम राखिएको छ । उहाँको आजै पशुपति आर्यघाटमा अन्त्येष्टि गरिनेछ ।