काठमाडौँ—आठ वर्षअघि सम्पन्न भएको सुन्दरी प्रतियोगिताकी प्रतिस्पर्धीले सामाजिक सञ्जालमार्फत आफूमाथि आयोजकले बलात्कार र यौन शोषण गरेको घटना सार्वजनिक गरेकी थिइन । पीडितको पक्षमा न्याय र बलात्कारीलाई सजायको माग गर्दै काठमाडौंको माइतीघरमा बलात्कारविरुद्धको प्रदर्शन भएको छ । सन् २०१४ मा भएको ‘मिस ग्लोबल इन्टरनेसनल’ प्रतियोगितामा सहभागी भएकी उनलाई आयोजकले होटलमा बोलाएर नशालु पदार्थ पिलाएर वेहोस पारेका थिए । वेहोसी अवस्थामा बलात्कार गरेको र त्यहाँ खिचेको फोटो, भिडियोले ‘ब्ल्याकमेल’ गर्दै निरन्तर ६ महिनासम्म यौन शोषण गरेको विषय सार्वजनिक भएसँगै माइतीघरमा बलात्कारविरुद्ध प्रदर्शन भएको हो ।
प्रदर्शनकारीहरूले बलात्कार र यौनजन्य हिंसाका मुद्दाहरूको निणर्य गर्न ‘फास्ट ट्र्याक’ अदालतको स्थापना गर्नुपर्ने, बलात्कार र अन्य यौनजन्य हिंसासम्बन्धी उजुरी गर्ने हदम्याद हटाउनुपर्ने‚ माग गर्दै प्रदर्शन गरेका थिए । प्रदर्शनमा ‘बलात्कार पीडितलाई न्याय दे’‚ ‘दोषीलाई सजाय दे’ लगायत नारा लगाएका थिए । मुलुकी ऐनमा बलात्कारविरुद्ध उजुरी गर्न एकवर्षे हदम्याद तोकिएको छ । बुधबार टिकटक र बिहीबार इन्स्टाग्रामबाट भिडियोमार्फत पीडित युवतीले आफूमाथि भएको घटना सार्वजनिक गरेपछि उनको समर्थन र बलात्कारविरुद्ध प्रदर्शन गरिएको हो ।