सार्क देशहरूका लेखकहरूकाे सङ्गठन “फाउन्डेशन अफ सार्क राइटर्स एण्ड लिटरेचर” (फाेस्वाल) काे आयाेजनामा गत १२ चैत्रमा सुरु भएकाे तीन दिने फाेस्वाल साहित्य सम्मेलन भारतकाे नयाँ दिल्लीमा सम्पन्न भएकाे छ ।
प्रतिष्ठानकी अध्यक्ष तथा साहित्यिक अभियन्ता अजीत काैरकाे परिकल्पनामा नयाँ दिल्लीकाे सिरी फाेर्टस्थित ललितकला तथा साहित्य प्रतिष्ठानकाे सभाभवनमा आयाेजित सम्मेलनमा भारत, नेपाल, श्रीलङ्का, भुटान र बाङ्गलादेशका साथै बिम्स्टेकका सदस्य देश थाइल्यान्ड, बर्मा र कम्बाेडियाका लेखकहरू पनि सामेल थिए ।
उद्घाटन समाराेहका प्रमुख अतिथि भारतकाे आघा खान प्रतिष्ठानका अध्यक्ष नेसर मुन्जी थिए भने प्रसिद्ध इतिहासविद् तथा चिन्तक आशीष नन्दी प्रमुख वक्ता थिए ।
समाराेहमा बङ्गलादेशका राष्ट्रपिता शेख मुजिबुर रहमानलाई उनका तीन पुस्तकका लागि मरणाेपरान्त फाेस्वाल लेखक सम्मान प्रदान गरिएकाे थियाे । यसै गरी नेपालका भीष्म उप्रेती, भुटानका डा. कुन्जाङ छाेदेन र डा. रिन्जिन रिन्जिन, भारतका आलाेक भल्ल, श्रीलङ्काकी कञ्चना प्रियकण्ठा तथा श्रीलङ्काकै काैशल्या कुमारसिङ्घेलाई “फाेसबाल साहित्य पुरस्कार” प्रदान गरिएकाे थियाे ।
तीन दिनसम्म चलेकाे सम्मेलनमा नेपाली अध्येताहरू डा. रामदयाल राकेश, डा. एकप्रसाद दुवाडी. रूपसिंह भण्डारी र महेश पाैड्यालले कार्यपत्र प्रस्तुत गर्नुभएको थियो भने कविहरू गाेपाल पराजुली, विधान आचार्य, भीष्म उप्रेती, सुमन पाेखरेल, रञ्जना निराैला, नाज सिंह तथा रूपसिंह भण्डारीले कविता वाचन गर्नुभएको थियो ।
कार्यक्रममा सार्कका पाँच राष्ट्रसहित ८ देशका सर्जक र अध्येताहरूकाे प्रस्तुति रहेकाे थियाे । महाेत्सवमा वाचित रचना र प्रस्तुत कार्यपत्रहरूमा लैङ्गिक समानता, वातावरणीय सजगता र लाेकसाहित्यकाे महत्त्वमाथि विशेष जाेड दिइएकाे थियाे ।
सार्क साहित्य सम्मेलन भनिँदै आएकाे यस कार्यक्रममा पाकिस्तानी र अफ्घानी लेखकलाई भाग लिन असहज हुन थालेपछि यसलाई यस वर्षदेखि फाेस्वाल साहित्य सम्मेलन भन्न थालिएकाे हाे । याे शृङ्खलाकाे ६३ औँ सम्मेलन हाे ।