६ फागुन, २०७८ कालीभक्त–कृष्णा पन्त स्मृति प्रतिष्ठानले शुक्रबार, कालीभक्त पन्त लोकसाहित्य अन्तर्राष्ट्रिय पुरस्कार लोकसंस्कृतिविद् तुलसी दिवस र चूडामणि बन्धुलाई प्रदान गरेको छ । राजधानीमा आयोजना गरेको समारोहमा महिला, बालबालिका तथा ज्येष्ठ नागरिकमन्त्री उमा रेग्मीले उक्त पुरस्कार प्रदान गरेकी हुन् ।
पुरस्कार २०७७ सालका लागि प्राध्यापक बन्धु र २०७८ सालका लागि दिवसलाई प्रदान गरिएको हो । पुरस्कारको राशी जनही १ लाख १० हजार रुपैयाँ तथा सम्मान पत्र रहेको छ ।
लोकसंस्कृतिका अभियन्ता कालीभक्त पन्तको ३३औं स्मृति दिवसको अवसरमा आयोजित समारोहमा पन्तको प्रसिद्ध कृति ‘हाम्रो सांस्कृतिक इतिहास’ (२०२८)को तेस्रो संस्करण कृति सार्वजनिक गरिएको थियो । पर्वत जिल्लाको लिमीठानामा १९६४ सालमा जन्मेका पन्तको ‘पश्चिम ४ नम्बर नेपालको इतिहास’, ‘किसान गीता’, ‘हाम्रो राष्ट्रिय कर्तव्य दर्शन’, ‘गीत सुधारको राष्ट्रिय बाटो’, ‘छुतभेद र कर्तव्य’ र ‘शुम्भवध’ कृति प्रकाशित छन् ।
राणाशासनको विरोधमा जेल जीवनसमेत व्यतीत गरेका पन्त २०१९ सालबाट राजनीतिबाट संन्यास लिएर लोकसंस्कृति अध्ययनमा समर्पित भएका थिए । उनको योगदानलाई लिएर परिवारका सदस्यले प्रतिष्ठान गठन गरी स्रष्टा सम्मान, छात्रवृत्ति कोष स्थापना गरी दलित विद्यार्थीलाई पुरस्कार तथा सम्मान प्रदान गर्दै आएको प्रतिष्ठानका सदस्य महेश्वर पन्तले जनाएका छन् ।