काठमाडौँ– लामाे समयदेखि देशबाहिर बसाइँ रहेपनि नेपाली साहित्य तथा सङ्गीत सिर्जनामा रहेकी स्रष्टा गीता खत्री मातृभूमिमा आएर आफ्नो संगीत सिर्जनामा पोखिएकी छिन् ।
शनिवार जमलस्थित राष्ट्रिय नाचघरमा गीतकार संघ नेपालको आयोजनामा भएको ‘गीतकार गीता खत्री साङ्गीतिक साँझ’मा उनले एक दर्शनभन्दा भन्दा बढी गीति सिर्जनाहरु प्रस्तुत गरिन् ।
माटोको माया, देशप्रेम, बुबाआमा तथा प्रकृतिप्रेम, जीवनसाथीसँगको आत्मीयता, भरोसा, परदेशको कथा, घरदेश रित्तिँदै गरेको चिन्ता जस्ता विविध संवेदनाले ओतप्रोत उनको १६ वटा सिर्जनाहरुले माहोललाई भावुक बनाएको थियो ।
खत्रीका बुवाआमा कमल बहादुर खड्का र आमा मखमली खड्काको शुभाशिष र गणेश स्तुति भजन थालनी गरिएको कार्यक्रममा खत्रीका ‘पिरतीको फूल’, ‘किन आज उदास’, ‘भरोसा छैन जीवनको’, ‘राती फुल्ने फूल’, ‘समय बगिरहेछ’ सिर्जनाहरु प्रस्तुत भएका थिए ।
कार्यक्रमको वाद्यवादनमा राजु सिंह ( संगीत संयोजक, दिनेश राज रेग्मी ( किबोर्ड साथै सहायक संगीत संयोजक, रविन कार्की (ढली,सोलो भाइलिन, सुरज प्रधान (लिड गितार, कुशल थापा ( बेस गीतार, संजिव मैनाली ( बाँसुरी, सुधिर चौधरी (तबलारमादल, जेपि जोशी (ढोलक, भुपेन्द्र रसाइली (अक्टोप्याड को भूमिकामा रहेका थिए ।
सांगीतिक साँझमा प्रस्तुत भएका सबै गीतहरू स्वरुपराज आचार्य, नरेन्द्र प्यासी, पविता परियार, हरि लम्साल, सिर्जना लामा, सपना श्री, दीपक लिम्बू जस्ता स्थापित गायकहरूको स्वरमा रेकर्ड भइसकेका छन् ।
‘भरोसा छैन जीवन’को बोलको गीत खत्रीकै स्वरमा रेकर्ड भएको छ भने ‘मखमली मखमली’ बोलको गीत गीताका बुवाको स्वरमा रेकर्ड भएको छ ।
कार्यक्रममा ‘गीतकार संघ नेपाल’का अध्यक्ष बसन्त वित्यासी थापाले गीता खत्रीलाई ‘डायस्पोरा गीतकार सम्मान–२०७८’ बाट १५हजार रुपैयाँ नगद सहित दोसल्ला र सम्मानपत्रले सम्मान गरे ।
साथै उनको जीवन साथी राम खत्रीलाई पनि खादा मालाले सम्मान गरिएको थियो । फिल्म निर्देशक तथा साहित्यकार राजेन्द्र शलभको डिजाइनमा भएको कार्यक्रममा संगीत तथा साहित्य क्षेत्रका विशिष्ट व्यक्तित्वहरूको बाक्लो उपस्थिति रहेको थियो ।