अविरल वर्षा र बाढी: ७ जलविद्युत आयोजनाको उत्पादन बन्द, देशभर उच्च सतर्कता

काठमाडौं। अविरल वर्षासँगै खोलानालाको जलस्तर उच्च भएपछि जलविद्युत आयोजनाहरु जोखिममा परेका छन्। खोलानालामा आएको बाढीलाई ध्यानमा राख्दै माथिल्लो तामाकोसीसहित निजी क्षेत्रका ७ आयोजना बन्द गरिएका छन्। बाढीले पूर्वाधारमा पर्न सक्ने क्षतिविरुद्ध सावधानी अपनाउँदा ६४० मेगावाट बराबरको ऊर्जा उत्पादन ठप्प भएको छ।नेपाल विद्युत प्राधिकरण स्रोतका अनुसार ४५६ मेगावाटको माथिल्लो तामाकोसी शुक्रबार राति १:४३ बजे र ६० मेगावाटको सुनकोसी १०:४६ बजे बन्द गरिएका हुन्। अधिकांश आयोजना नदीको बहावमा आधारित भएकाले अविरल वर्षासँगै क्षतिको जोखिम उच्च भएको हो। क्षति हुन नदिन देशभरका आयोजनाहरुमा सतर्कता अपनाइएको छ।