काठमाडौँ — युवाकवि सुविन न्यौपाने ‘कान्जिभाइ’को पहिलो कवितासंग्रह ‘कमरेडको जनै’ सार्वजनिक भएको छ । प्रज्ञा प्रतिष्ठानमा शुक्रबार कवि श्रवण मुकारुङ, बिन्दु शर्मा, मानुषी भट्टराई र नेता विश्वप्रकाश शर्माले संग्रह सार्वजनिक गरे ।
समीक्षक बिन्दु शर्माले भने सार्वभौम अभिव्यक्ति र समकालीन चेतका आधारमा कविले कविता रचना गरेको उल्लेख गरिन् ।
कवि श्रवण मुकारुङले कविताको विषयवस्तु समान भए पनि कविको शिल्प र शैली नितान्त मौलिक हुनुपर्नेमा जोड दिए ।
कांग्रेस महामन्त्री विश्वप्रकाश शर्माले कवि-लेखकले नेतृत्ववर्गलाई सधैं सचेत राख्न धारिला सिर्जना गरिरहनुपर्ने बताए । ‘देश बन्नु भनेको बाटो र बिजुली बन्नुमात्र होइन, ठूला भवन र सहर बन्नुमात्र होइन । संस्कृति, सभ्यता र कलामा समुन्नत हुनुचाहिँ देश बन्नु हो,’ नेता शर्माले भने ।
कार्यक्रममा सन्तोष भट्ट र निर्भीकजंग रायमाझीले संग्रह भित्रबाट कविता वाचन गरेका थिए । इन्डिगो इन्कले प्रकाशन गरेको ‘कमरेडको जनै’ भित्र ४७ थान कविता संग्रहित छन् ।