कविता: अर्को चुनावको पर्खाइमा !

मनाउलान् जित्नेहरूले उन्माद
क्षणिक निराशा बोकेर हार्नेहरूले
पश्चाताप गर्लान्
जोड घटाउमा बिताउलान केही दिन
चियापसल, चौतारी
चुनावी समिक्षाको थलो बन्छन्
र फेरि पनि हार्छन् जनताहरू ।

देखेकै हो जित्नेको औकात
क्षणिक रमाइलो
दुईचार सभा–सम्मेलन
उदघाट, सिफारिस
र अख्तियार विरोधी कामहरू ।

जित्नले भ्रान्तिका
स–साना योजना कोर्लान्
हार्नेले विरोध गर्लान्
बागिहरू अझै बागि बनेर
बिथोल्न खोज्लान् जनताका कामहरू
सदियौँ देखि आखिर
जनताले भोगेकै हो दास्ति
न फोहर उठछ
न बन्छ भत्केको मन्दिर
न खुल्छ नयाँ ल्याण्डफिल्ड ।

न जित्नेसँग आशा
न हार्नेको पुनरागमन
थाति राखेर मतदान पूर्वको संकल्प
जित्ने र हार्नेको दोसामिसिले
सकिन्छन् मतदाताका सपनाहरू ।

वर्तमान अन्यौलग्रस्त छ
भविष्य अन्धकार नै छ
जित्नेको खप्की
हार्नेको सराप
अनेक अनेक कष्टले
तडपिँदै तडपिँदै निराशा पालेर
अर्को चुनाव पर्खनु बाहेक
के हुन सक्छर
मतदाताको अर्को विकल्प ?

ऋषभदेव घिमिरे
गोदावरी, काठमाडौँ
ghimirerd@gmail.com