फिल्म ‘सोल अफ द कमान्डो’ मंसिर २३ गतेबाट प्रदर्शनमा आउने भएको छ । फिल्ममार्फत २४ वर्षपछि राजकुमार राईको अभिनयमा पुनरागमन हुने भएको छ । राईले सन् १९९८ मा नेपाली फिल्म ‘कमाण्डो’ मा मुख्य भूमिकाको रुपमा काम गरेका थिए । यो फिल्ममा पनि उनलाई मुख्य भूमिकामा नै देख्न सकिन्छ ।
सन् १९८६ मा दक्षिण कोरियामा सम्पन्न दशौँ एशियन खेलकुदमा तेक्वान्दो खेलमा कास्य पदक तथा सन् १९९९ मा नेपालमा भएको आठौँ दक्षिण एशियाली खेलकुदमा स्वर्ण पदक प्राप्त गर्न सफल अन्तर्राष्ट्रिय क्षेत्रमा नेपालको नाम उच्च राख्न सफल तेक्वान्दो खेलाडी रहेका राईले नेपाली फिल्म क्षेत्रमा पनि विशेष योगदान पुर्याएका छन्।
फिल्ममा राईका अलवा शिशिर वाङ्ग्देल, नरेन खड्का, शेषुका राई, मिलन राई, रवि थापा, रुपेश झा, पुष्प श्रेष्ठ, सीमा राई, नरेन्द्र लिम्बु, पूर्ण लिम्बु, सुष्मिता लिम्बुको पनि मुख्य अभिनय छ । फिल्मको निर्देशन युवराज (वीरबहादुर) राईले गरेका हुन् भने कार्यकारी निर्माता, विजय एल राई हुन्। सिलिचुङ फिल्म प्राइभेट लिमिटेडले निर्माण गरेको फिल्मको निर्मातामा मिलन राई, रवि थापा र धन लिम्बू रहेका छन् ।