काठमाडौँ —नेपाल स्रष्टा समाजको १६औं स्थापना दिवसका अवसरमा बहुभाषिक कविगोष्ठी सम्पन्न गरिएको छ।
बहुभाषिक कवि गोष्ठीमा २१ भाषाका स्रष्टाले रचना वाचन गरेका छन् । गोष्ठीमा कवि नवराज कट्टेलले संस्कृत, शिवराज जैसीले अछामीमा, कविराज तामाङ र अजितमान तामाङले तामाङमा, कोइँच (सुनुवार)मा शारदा किरात सुनुवारले रचना वाचन गरेका थिए ।
स्तै खसमा रमेशजंग थापा, थारुमा लक्की चौधरी, चेपाङमा सुमन प्रजा, वाम्बुलेमा गणेश राई, शीतल गिरीले बज्जिका भाषामा वाचन गरेका थिए । भोजपुरीमा गोपाल अस्क, शेर्पामा सेर्कु शेर्पा, अब्दुल सलामले उर्दूमा, नेपालभाषा (नेवारी)मा प्रेममान डंगोल र नरेन्द्रबहादुर श्रेष्ठले कविता वाचन गरेका थिए ।
कवि प्रल्हाद पोखरेल, राजेन्द्र सलभ र विश्वविमोहन श्रेष्ठले नेपालीमा, हेमन्त दाहाल र राजेन्द्र खनालले अंग्रेजीमा, सीताराम प्रकाशले हिन्दीमा, राजेन्द्र गुरागाईले बंगालीमा, धिरेन्द्र प्रेमर्षिले मैथिलीमा कविता वाचन गरेका थिए । गोष्ठीमा धिमालमा सोम धिमाल, गुरुङमा रत्नबहादुर गुरुङ र थामीमा रमेश थामीको कविता सहभागी थियो ।
स्रष्टा समाजका अध्यक्ष साहित्यकार श्रीओम श्रेष्ठ ‘रोदन’ले मुलुकमा बोलिने भाषा साहित्यको उन्नयनका निम्ति बहुभाषिक कवि गोष्ठीको आयोजना गरिएको बताए । समालोचक लक्ष्मण गौतमले जीवन्त नेपाली समाजको भाषाहरूको साहित्य एकैथलोमा वाचनले ‘इन्द्रेणी सौन्दर्य’को विकास गर्ने बताए ।
नाटककार अशेष मल्ल, समाजका संस्थापक अध्यक्ष पवन आलोक, कोषाध्यक्ष तारा सुवेदीलगायतले गोष्ठीबारे बोलेका थिए ।