नारायणगढ-मुग्लिन सडक आज र भोलि बन्द नहुने

काठमाडौं । नारायणगढ-मुग्लिन सडकखण्ड दुई दिन बन्द नहुने भएको छ ।

भोलि परेकाे माघे संक्रान्ति पर्वलाई लक्षित गर्दै आज र भोलि २४ सै घण्टा सडक खुला गरिएकाे मुग्लिन-नागढुंगा आयोजना (पश्चिम खण्ड)ले जनाएकाे छ ।

तुइन खोलामा पुल बनाउन पहाड काट्ने कामका लागि साे सडकखण्ड दिउँसाेकाे समयमा बन्द गर्ने गरिएकाे थियाे ।

तर माघे संक्रान्ति पर्वमा प्रसिद्ध धार्मिकस्थल देवघाटमा नुहाउन, दर्शन गर्न आउने भक्तजनहरुको सुविधाका लागि आज र भाेलि २४सै घण्टा सडक खुला गरिएकाे हाे ।

माघ २ गतेदेखि माघ २० गतेसम्म भने दैनिक ४ घण्टा सडक बन्द हुनेछ । तुइन खोलामा पुल बनाउने फाउण्डेसन बनाउन पहाड काट्का लागि पुस ७ गतेदेखि २८ गतेसम्म ३ साताका लागि सडक बन्द गरेर काम थालिएको थियो । तर तोकिएको समयभित्र पहाड काट्ने काम नसकिएपछि थप ३ साता अर्थात माघ २० गतेसम्म दैनिक ४ घण्टा सडक बन्द गर्ने निर्णय गरिएकाे हाे ।