रविलालको स्मृतिमा जनसांस्कृतिक महासंघको कविता प्रतियोगिता

राष्ट्रिय जनसाँस्कृतिक महासंघ गण्डकी प्रदेश समितिले शनिबार खुला कविता प्रतियोगिता आयोजना गरेको छ । प्रतियोगितामा शर्मिला कार्की प्रथम, संयोग बस्याल द्वितीय, रमा खतिवडा तृतीय, रोशन तिमिल्सिना सान्त्वना तथा आर्या त्रिपाठीले प्रोत्साहन पुरस्कार पाएका छन् ।

राष्ट्रिय जनसाँस्कृतिक महासंघका संस्थापक केन्द्रीय सदस्य प्राडा रविलाल अधिकारीको ७९ औं जन्म जयन्तीको अवसरमा कार्यक्रम भएको हो । सो अवसरमा नेकपा एमाले गण्डकी प्रदेश कमिटी सचिव धनञ्जय दवाडीले साहित्य, कला र संस्कृतिमा राजनीतिक नेतृत्वको ध्यान जान नसकेकोमा उल्लेख गरे । कवि रमेश श्रेष्ठले कवितामा राजनीतिक चेत हुनुपर्ने तर नारा बन्न नहुनेमा सचेत गराए ।

राष्ट्रिय जनसाँस्कृतिक महासंघ केन्द्रीय उपमहासचिव मनकुमार श्रेष्ठले प्राडा रविलालको जीवनबाट सरलता र निरन्तरताको पाठ सिक्न सकिने उल्लेख गरे । कार्यक्रममा पोखरा प्रज्ञा प्रतिष्ठानका कुलपति पद्मराज ढकाल, समालोचक डा यदुनन्दन उपाध्याय र साहित्यकार अधिकारीका छोरा प्रमोद अधिकारीले प्राडा रविलालको जीवनका विविध पक्षबारे बोलेका थिए ।

महासंघ गण्डकी प्रदेश कमिटी अध्यक्ष सुवास मल्लले प्राडा अधिकारी गण्डकी प्रदेशमा महासंघको एक जनामात्र संस्थापक भएको जनाउँदै उनको जयन्ती हरेक वर्ष कार्यक्रम गरी मनाइने बताए ।

३८ कवि सहभागी भएको प्रतियोगिताको अन्तिम चरणका लागि १५ वटा कविता छनौट भएका थिए । प्रतियोगिताका निर्णायकमा कवि रमेश श्रेष्ठ, समालोचक डा यदुनन्दन उपाध्याय र कवि लक्ष्मी थापा थिए ।

कार्यक्रममा महासंघ कास्की अध्यक्ष शिवहरि ढुंगाना, महासंघ गण्डकी प्रदेश कमिटी महासचिव छवि सुवेदीले समेत बोलेका थिए ।