पत्रकारितामा समान अनुभूतिको सिद्धान्त आत्मसात गर्नुपर्छः अध्यक्ष डा. आचार्य

काठमाडौँ- प्रेस काउन्सिल नेपालका केन्द्रीय अध्यक्ष डा. कुमार शर्मा आचार्यले पत्रकारितामा समान अनुभूतिको सिद्धान्त आत्मसाथ गर्नुपर्ने बताएका छन् । कपिलवस्तुमा पत्रकार आचारसंहिता सम्बन्धी जागरण कार्यक्रमलाई सम्बोधन गर्दै उनले यस्तो बताएका हुन् ।
आफूले लेख्ने समाचार आफ्नै विषयमा आयो भने कस्तो अनुभूति हुन्छ भन्ने बुझेर विवेकपूर्ण ढंगले समाचार लेख्न सके आचारसंहिता स्वतः पालना हुने उनले बताए । पत्रकारले आचारसंहिता पालना गरे कानुनी रूपमा प्रेस काउन्सिलले सुरक्षा गर्ने डा. आचार्यले प्रतिबद्धता व्यक्त गरे ।
समाचार प्रकाशन तथा प्रसारणपछि त्यसको सम्पूर्ण जिम्मेवारी पत्रकार स्वयंको हुने उनले उल्लेख गरे । सञ्चार माध्यमले भोगिरहेको आर्थिक सङ्कट समाधानका लागि मिडिया मर्जरको अवधारणा अघि सारिएको आचार्यले बताए । यस्तै प्रेस काउन्सिल नेपालका सदस्य सन्तराम बिडारीले काउन्सिललाई थप व्यवस्थित बनाउँदै लगिएको र प्राप्त उजुरीहरूको समयमै सम्बोधन भइरहेको बताए । पत्रकारले आफ्नो मूल धर्म र कर्तव्यको पालना गर्नुपर्नेमा उनले जोड दिए ।
प्रेस काउन्सिल नेपालको आयोजना तथा नेपाल पत्रकार महासंघ कपिलवस्तुको संयोजनमा बिहीबार आयोजित कार्यक्रममा सञ्चारकर्मीलाई पत्रकार आचारसंहिता सम्बन्धी सह–प्रशासकीय अधिकृत÷सूचना अधिकारी रामशरण बोहराले प्रशिक्षण दिएको महासंघका अध्यक्ष डिलाराम भुसालले बताए ।
पत्रकार महासंघ कपिलवस्तुका संस्थापक अध्यक्ष नारायण पौडेल, महासंघका उपाध्यक्ष खग प्रसाद चापागाई बुद्ध आवाजका लक्ष्मण बेल्बासे, बुद्ध दर्पण राष्ट्रिय दैनिककी पार्वती पाण्डे, पत्रकार शनिउल्ला धोबीलगायत वक्ताहरूले पत्रकारितालाई मर्यादित, जिम्मेवार र व्यवस्थित बनाउँदै लैजानुपर्ने आवश्यकता रहेको भन्दै कार्यक्रमलाई सम्बोधन गरेका थिए ।