टासी ल्हाजोमको आक्रोश, ‘म तिब्बती होइन, तिब्बती ब्वाइफ्रेन्ड पनि छैन’

काठमाडौँ – राष्ट्रिय स्वतन्त्र पार्टी (रास्वपा) को समानुपातिक सूचीमा रहेकी टासी ल्हाजोमले आफ्नो उम्मेदवारी फिर्ता लिएको भन्ने समाचारको खण्डन गरेकी छिन् । विभिन्न सञ्चारमाध्यममा आफ्नो नाम समानुपातिक सूचीबाट हटेको वा फिर्ता लिएको भन्ने खबर आएपछि सामाजिक सञ्जालमार्फत उनले ती समाचारहरू आधारहीन भएको स्पष्ट पारेकी हुन् ।
टासीले आफू समानुपातिक बन्दसूचीबाट नहटेको र आफ्नो नाम हटाउनमा आफ्नो कुनै संलग्नता नरहेको बताएकी छिन् ।उनले आफूमाथि लागेका ’तिब्बती’ भएको आरोपको पनि प्रतिवाद गरेकी छिन् । आफू तिब्बती नभएको, ’फ्री तिब्बत’ अभियानमा कुनै पनि हिसाबले नजोडिएको र आफ्नो ब्वाइफ्रेन्ड पनि तिब्बती नभएको उनले दाबी गरेकी छिन् । बारम्बार स्पष्टीकरण दिँदा पनि गलत हल्ला फैलाइएको भन्दै उनले असन्तुष्टि व्यक्त गरेकी छिन् ।आफूमाथि आरोप लगाउनेहरूलाई टासीले प्रमाण पेस गर्न खुला चुनौती दिएकी छिन् । उनले आफू वा आफ्नो संलग्नताको बारेमा कसैले प्रमाण भेटेको दाबी गर्छ भने त्यसलाई सार्वजनिक गर्न चुनौती दिएकी हुन् । उनले प्रमाणबिना चरित्र हत्या नगर्न सचेत गराएकी छिन् ।
एक सार्वभौम देशको नागरिकको हैसियतले नेपालको संविधानले दिएको अधिकार प्रयोग गरेर चुनाव लड्न पाउनु आफ्नो हक भएको उनले जिकिर गरेकी छिन् ।उनले आफ्नो संवैधानिक अधिकार हनन गर्ने वा आफूलाई रोक्न खोज्ने जोकोहीविरुद्ध कानुनी उपचारमा जाने चेतावनी समेत दिएकी छिन् ।