काठमाडौं – अमेरिका र इरानबीचको तनाव निरन्तर बढ्दै गएको छ । राष्ट्रपति डोनाल्ड ट्रम्पको नयाँ निर्णयले दुई देशबीचको यो कटुता थप बढाइदिएको छ ।
ट्रम्पले विश्वको सबैभन्दा ठूलो विमानवाहक पोत ‘यूएसएस गेराल्ड आर फोर्ड’लाई क्यारिबियन सागरबाट हटाएर मध्यपूर्व पठाउने आदेश दिएका छन् । यो मध्यपूर्वमा तैनाथ हुने अमेरिकाको दोस्रो ठूलो विमानवाहक पोत हुने बताइएको छ । यो क्षेत्रमा ‘यूएसएस अब्राहम लिंकन’ विमानवाहक पोत पहिलेदेखि नै छ ।
इरानमाथि दबाब बनाउने चाहनामा ट्रम्प प्रशासन
ट्रम्पको यो निर्णयपछि अब मध्यपूर्व क्षेत्रमा अमेरिकाका दुई ठूला विमानवाहक पोत र तिनका साथमा जाने युद्धपोतहरू यो क्षेत्रमा पुग्ने बताइएको छ ।
ट्रम्प प्रशासन यो कदममार्फत इरानको आणविक कार्यक्रममाथि दबाब बनाउन चाहन्छ ।
पहिलेदेखि नै तैनाथ छ अब्राहम लिंकन विमानवाहक पोत
यूएसएस अब्राहम लिंकन र तीनवटा मिसाइलयुक्त विध्वंसक जहाज (डिस्ट्रोयर) दुई हप्ताअघि नै मध्यपूर्व पुगिसकेका छन् । यूएसएस फोर्ड अचानक पठाइएको बताइएको छ ।
गत वर्ष अक्टोबरमा ट्रम्पले यसलाई भूमध्य सागरबाट क्यारिबियन पठाएका थिए । त्यसबेला भेनेजुएलाका तत्कालीन राष्ट्रपति निकोलस मादुरोलाई पक्राउ गर्न त्यहाँ ठूलो संख्यामा सैनिक तैनाथ गरिएको थियो ।
ह्वाइट हाउसले के भन्यो ?
ट्रम्पले पश्चिमी गोलाद्र्धमा बढी ध्यान दिने बताएका थिए । तर, यो कदम ट्रम्पले यसअघि दिएको अभिव्यक्तिभन्दा फरक छ ।
यो हप्ताको सुरुमा ट्रम्पले मध्यपूर्वमा अर्को युद्धपोत पठाउने बारेमा सोचिरहेको बताएका थिए । अहिलेसम्म ह्वाइट हाउसले यो विषयमा कुनै टिप्पणी गरेको छैन। एजेन्सी
Discussion about this post