इङलिश प्रिमियर लिग क्लब टोटनह्यामले मुख्य प्रशिक्षक इगोर टुडोर बर्खास्त

काठमाडौँ – इङलिश प्रिमियर लिग क्लब टोटनह्यामले मुख्य प्रशिक्षक इगोर टुडोरलाई पदबाट बर्खास्त गरेको छ । उनले मात्र ४४ दिनमा ७ खेलको नेतृत्व गरेपछि क्लबले उनीसँगको सहकार्य अन्त्य गरेको हो ।
नटिङ्घम फरेस्टसँगको निराशाजनक हारपछि क्लबले अन्ततः टुडोरलाई हटाउने निर्णय गरेको जनाएको छ । उनी अन्तरिम प्रशिक्षकका रूपमा फेब्रुअरी १३ मा नियुक्त भएका थिए ।
टुडोरको नेतृत्वमा टोलीको प्रदर्शन कमजोर रहँदा रेलिगेसनको खतरा कायमै रहेपछि क्लब व्यवस्थापनले कदम चालेको हो । टोटनह्याम प्रिमियर लिगमा हाल ३१ खेलमा ३० अंकसहित १७औं स्थानमा रहेको छ ।
क्लबले जारी गरेको विज्ञप्तिमा टुडोरसँग आपसी सहमतिमा तत्काल लागू हुने गरी अलग भएको उल्लेख गरिएको छ । साथै गोलरक्षक प्रशिक्षक टोमिस्लाभ रोगिच र शारीरिक प्रशिक्षक रिकार्डो रान्याच्ची पनि आफ्नो जिम्मेवारीबाट बाहिरिएका छन् ।
क्लबले उनीहरूको छोटो अवधिको योगदानका लागि धन्यवाद दिँदै टुडोरको व्यक्तिगत कठिनाइप्रति सहानुभूति व्यक्त गरेको छ । नयाँ मुख्य प्रशिक्षकबारे जानकारी छिट्टै सार्वजनिक गरिने क्लबले जनाएको छ