नेपालमा विश्व सामाजिक मञ्चको १६ औँ सम्मेलन आजदेखि

काठमाडौं । विश्व सामाजिक मञ्चको १६ औँ सम्मेलन नेपालमा आजदेखि हुँदैछ । संघीय राजधानी काठमाडौंमा हुने सम्मेलनमा सात वटै महादेशका ९२ भन्दा धेरै देशका विभिन्न सामाजिक आन्दोलनका अगुवा र प्रतिनिधिहरू सहभागी हुँदैछन् ।

सामाजिक न्याय, जलवायु न्याय, मानवअधिकार, समानता, वातावरण संरक्षण, दिगो शान्ति कायमको दवाव सिर्जना गर्ने उदेश्यले विश्वव्यापी रुपमा आयोजना हुँदै आएको ‘विश्व सामाजिक मञ्च’को सम्मेलन यसपटक नेपालमा हुन लागेको हो ।

‘अर्को विश्व सम्भव छ’ भन्ने नाराका साथ हुने सम्मेलनमा नवउदारवाद, भुमण्डलीकरण, पूँजीवाद, जलवायु संकट, पितृसत्ता, जातजाति, छुवाछुत तथा रंगभेद, नश्लभेद, लैंगिकता तथा यौनिकताका आधारमा हुने हिंसा तथा विभेद विरुद्ध छलफल र बहस हुने सम्मेलन व्यवस्थापन समितिले जनाएको छ ।

विहीबारदेखि काठमाडौंमा सुरु भएको विश्व सामाजिक मञ्चको १६ औं सम्मेलनमा ‘अर्को विश्व सम्भव छ’ भन्ने मूल नारमा विशेष बहस हुँदैछ । सम्मेलनमा १३ वटा मूल विधामा वहस हुने आयोजकको भनाइ छ । सम्मेलनमा ठूलासाना गरी ४ सय २ वटा कार्यक्रमहरु र ९२ देशका प्रतिनिधि सहभागी छन् ।

सम्मेलनका क्रममा मूलतः १३ वटा मुख्य विधाहरुमा आधारित भएर साना–ठूला ४०२ वटा कार्यक्रमहरु हुनेछन् ।

जसमा मजदुर आन्दोलन, किसान र कृषि आन्दोलन, भुमि अधिकार, कृषि खाद्य सुरक्षा, महिलावादी आन्दोलन, सीमान्तकृत सामाजिक समुह, लोकतान्त्रिक अभियान, शरणार्थी तथा आप्रवासन आन्दोलन, मिडिया कन्क्लेभ, अन्तर महादेशीय युवा सम्मेलन लगायतका कार्यक्रम छन् । सम्मेलनका लागि ९२ देशका एक हजार २ सय ५२ वटा संस्था र समुहरुका स्वआयोजकका रुपमा दर्ता भएका छन् । सामेलनमा ४० देखि ५० हजार जनाको सहभागिता रहने अपेक्षा गरिएको छ । पहिलो पटक ब्राजिलमा सन् २००१ देखि सुरु भएको यो विश्वव्यापी सम्मेलन हरेक बर्ष विभिन्न देशले आयोजना गर्दै आएका छन् । यस मञ्चलाई असमानताविरुद्ध विशुद्ध नागरिक समाज आन्दोलनको विश्वव्यापी प्लाटफर्ममा रुपमा लिइने गरेको छ ।सम्मेलनका कार्यक्रमहरुलाई नेपाली, अंग्रेजी, फ्रेन्च, स्पेनिस, अरबिक र पोर्तुगिज गरी छ भाषामा अनुवादको व्यवस्था गरिएको छ ।