स्लोभाकियाका प्रधानमन्त्री रोबर्ट फिकोमाथि गोली प्रहार

काठमाडौं : स्लोभाकियाका प्रधानमन्त्री रोबर्ट फिकोमाथि गोली हानिएको छ। गोली लागेपछि प्रधानमन्त्रीलाई घाइते अवस्थामा अस्पताल लगिएको छ।

घटनास्थलमा उपस्थित पत्रकारहरुका अनुसार धेरै पटक गोली चलेको आवाज सुनिएको थियो। प्रहरीले गोली चलाउने अभियुक्तलाई पनि नियन्त्रणमा लिएको छ।

गोली राजधानीभन्दा करिब २ घण्टाकोको दुरीमा ह्याण्डलोभा भन्ने ठाउँमा भएको बीबीसीले उल्लेख गरेको छ। ह्यान्डलोभामा सरकारी बैठक सकेर बाहिरिँदै गर्दा गोली हानीएको अधिकारीहरुले जनाएका छन्। उनको प्राथमिक उपचार पछि हेलिकोप्टरमा राजधानीको अस्पतालमा उपचारका लागि लगिएको छ।

स्लोभाकियाकी राष्ट्रपति जुजाना सापुटोभाले यो क्रूर आक्रमणबाट आफू स्तब्ध भएको बताएकी छन्। उनको पछिल्लो अवस्था बारे जानकारी आउन भने बाँकी छ।