माछापुच्छ्रे बैंकका कर्मचारी बचतकर्ताको करोडौँ ठगेर फरार

रुपन्देही । माछापुच्छ्रे बैंक लिमिटेडको रुपन्देहीको मर्चवारस्थित माछापुच्छ्रे बैंकको शाखारहित सेवा केन्द्रको जिम्मा पाएका कर्मचारीले बचतकर्ताले बचत गरेको रकम झ्वाम पारेका घटना बाहिरिएको छ । रुपन्देहीकै सम्मरीमाई गाउँपालिकामा भएको यस्तै प्रकृतिको घटना सेलाउन नपाउँदै बैंकको मर्चवारस्थित शाखाबाट पनि बचतकर्ता ठगिएका हुन् ।बचतकर्तालाई बैंकको छाप र सहि सहित भौचरसमेत दिइएको छ । तर सो रकम सिष्टममा इन्ट्री नै नभएकोले सो रकम बैंकको सिष्टममा देखिएन । आफ्नो रकम बैंकमा जम्मा गरेका बचतकर्ताले जव आफ्नो रकम अर्को शाखाबाट निकाल्न खोजे, तव बैंकमा पैसा नै नभएको थाहा पाएपछि बैंकको नाममा ठगी गरेका रमेश चौहानको हर्कतको पोल खुल्यो ।

रकम लिने, सिष्टममा इन्ट्री नगर्ने, आफैँ सो रकम चलाउने र बचतकर्तालाई बैंकको भौचरमा सहि छाप गरेर दिने गरिएको र यसरी करोडौं रुपैयाँ ठगिएको भन्दै पीडित बचतकर्ताले जिल्ला प्रशासन कार्यालय र नेपाल राष्ट्र बैंक गुहारेपछि सो घटना बाहिरिएको हो ।