जलवायु न्यायका लागि सरकारले अन्तर्राष्ट्रिय समुदायमा मुद्दा उठायो : प्रधानमन्त्री ओली

सोलुखुम्बु । प्रधानमन्त्री केपी शर्मा ओलीले उच्च तापमानका कारण हिमालमा हिउँ पग्लन थालेको भन्दै जलवायु न्यायका लागि सरकारले अन्तर्राष्ट्रिय समुदायमा मुद्दा उठाएको बताउनुभएको छ ।
लुक्ला नजिक सुर्केसम्म पुगेको ङिमदोर्जी शेर्पा पर्यटन सडक उद्घाटन गर्दै प्रधानमन्त्री ओलीले विश्वलाई सितल प्रदान गर्ने अग्ला हिमाल कालापत्थर हुनु दुखद् भएको भन्दै विकसित देशहरू संवेदनशील हुनुपर्ने धारणा राख्नुभयो ।
कार्यक्रममा भौतिक योजनामन्त्री देवेन्द्र दाहालले खुम्बु क्षेत्रको पर्यटन सडकलाई कालोपत्रे गर्न आवश्यक बजेट ब्यवस्थापन गर्ने आश्वनसन दिनुभयो । रक्षामन्त्री मानवीर राईले जलविद्युत् र पर्यटनमा प्रचुर सम्भावना बोकेको सोलुखुम्बुको सर्वांगिण विकासमा सरकार सचेत रहेको बताउनुभयो । कोशी प्रदेशका मुख्यमन्त्री हिक्मतकुमार कार्कीले यो पर्यटन सडक नेपालको होचो स्थान केचनाकवललाई विश्वको उच्च स्थानमा जोड्न उपयोगी हुने बताउनुभयो ।
सडक उद्घाटन गर्न नेपाली सेनाको हेलिकप्टर मार्फत सुर्के पुग्नु भएका प्रधानमन्त्री ओली करिब ३ घण्टा कार्यक्रम स्थलमा बसेर काठमाडौं फर्किनु भएको थियो ।