अन्तर्राष्ट्रिय नेपाली साहित्य समाज(अनेसास)को केन्द्रीय समितिको अध्यक्षमा साहित्यकार गोवर्द्धन पूजा विजयी भएको कुरा प्रकाशमा आएको छ । यसर्थमा अबको २ वर्ष अनेसास पूजाको नेतृत्वमा रहने कुरा निश्चित भएको छ। २०७९ असार २५ गते भएको निर्वाचनबाट पूजा ८०३ मतका साथ विजयी हुनु भएको हो । उहाँका प्रतिद्वन्द्वी सुनिल सङ्गमले ३०० मत मात्र ल्याउनु भएको थियो। अध्यक्ष पूजा नेपाली साहित्यमा धेरै अघिदेखि काव्य विधामा कलम चलाएर आइरहनु भएका र पत्रकारिता पनि गर्दै आउनु भएका व्यक्तित्व हुनुहुन्छ। विगत १२ वर्षदेखि अमेरिकाको बोस्टनलाई आफ्नो कर्मथलो बनाएर उहाँले अनेसासमा दुई कार्यकाल महासचिवको पूरा गरिसक्नु भएको थियो।
आज प्रकाशित परिणामअनुसार अन्तर्राष्ट्रिय नेपाली साहित्य समाज (अनेसास)का निवर्तमान महासचिव सर्वज्ञ वाग्ले वरिष्ठ उपाध्यक्षमा विजयी हुनु भएको छ । उहाँले ५४० मत ल्याउनु भएको हो भने उहाँका निकटतम प्रतिद्वन्द्वी लालगोपाल सुवेदीले ४ मत मात्र कम ५३६ ल्याउनु भएको थियो।
यस्तै समाजको क्षेत्रीय उपाध्यक्षमा डा. रेणु सोलु (५८७ मत) , महासचिवमा विमला निरौला (४६० मत ) विजयी भएका छन् । यस अघि बाँकी पदमा भने निर्विरोध पदाधिकारीहरू ➽ राजेन्द्रकुमार श्रेष्ठ(अमेरिका उपाध्यक्ष), महेश्वर शर्मा (अष्ट्रेलिया उपाध्यक्ष), सीता बराल (युरोप उपाध्यक्ष), निजानन्द मल्ल (कोषाध्यक्ष), तारा अधिकारी (सदस्य), सरिता अर्याल (सदस्य), सुदीपभद्र खनाल (सदस्य), यादव देवकोटा (सदस्य) र सुमित गिरी (सदस्य) चयन भइसकेका छन् ।
