काठमाडौँ- शेख हसिनाका विपक्षी नेता उस्मान हादीको मृत्युपछि बंगलादेशमा हिंसा भड्किएको छ। प्रदर्शनकारीहरूले बिहीबार राति देशका सबैभन्दा ठूला अखबारहरू, डेली स्टार र प्रोथोम आलोको कार्यालयमा जबरजस्ती प्रवेश गरे, तोडफोड गरे र आगजनी गरेका छन्।
यसबाहेक पूर्व राष्ट्रपति शेख मुजीबुर रहमानको निवासमा पनि तोडफोड गरिएको छ र शेख हसिनाको पार्टी अवामी लिगको कार्यालय पनि जलाइएको छ।
उस्मान हादी जुलाई २०२४ मा शेख हसिना विरुद्धको विद्यार्थी आन्दोलनका प्रमुख नेताहरू मध्ये एक थिए। डिसेम्बर १२ मा चुनावी प्रचारको क्रममा उनको टाउकोमा गोली लागेको थियो। त्यसपछि उनलाई राम्रो उपचारका लागि सिंगापुर लगिएको थियो। छ दिनपछि उनको मृत्यु भयो।
हिन्दू युवकको हत्या, शव रुखमा झुण्ड्याएर जलाइयो
बंगलादेशमा धर्मको अपमान गरेको आरोपमा मानिसहरूको समूहले एक हिन्दू युवकलाई कुटपिट गरी हत्या गरेको छ।
युवकलाई नाङ्गो पारेर झुण्ड्याइएको थियो र पछि उनको शरीरलाई खम्बामा बाँधेर आगो लगाइएको थियो।
प्रहरीले बिहीबार राति भालुकामा घटना भएको बताएको छ। बीबीसी बंगलाद्वारा घटनाको पुष्टि गरिएको छ।
प्रहरीले मृतक युवकको पहिचान दिपु चन्द्र दासको रूपमा गरेको छ। अधिकारीहरूले सुरुमा उनी स्थानीय कपडा कारखानामा काम गर्थे र त्यस क्षेत्रमा एउटा कोठा भाडामा लिएर बस्थे भन्ने पत्ता लगाएका थिए।
‘बिहीबार राति करिब ९ बजे, केही आक्रोशित व्यक्तिहरूले उनलाई पैगम्बरको अपमान गरेको आरोपमा समातेर कुटपिट गरे। त्यसपछि उनीहरूले उनको शरीरमा आगो लगाइदिए,’ भालुका प्रहरी चौकीका ड्युटी अफिसरले बीबीसी बंगलालाई भने।
सूचना पाएपछि प्रहरी घटनास्थलमा पुगेर स्थिति नियन्त्रणमा लिएको छ। अधिकारीहरूले दासको शव बरामद गरी मयमनसिंह मेडिकल कलेज अस्पतालको शव गृहमा पठाइएको बताएका छन्। घटनामा अहिलेसम्म कुनै मुद्दा दर्ता गरिएको छैन।
