अरुणाचल प्रदेशका थप ३० स्थानलाई चीनले दियो नयाँ नाम

काठमाडौँ । चीनले अरुणाचल प्रदेशका केही स्थानलाई नयाँ नाम दिएको छ । उसको चौथो सूचीमा ३० स्थानका नयाँ नाम समावेश छन् ।

अरुणाचल प्रदेशमा आफ्नो दाबी बलियो बनाउन चीनले यहाँका ठाउँको नयाँ नाम जारी गर्दै आएको छ । यद्यपि भारतले उनीहरुलाई अस्वीकार गर्दै आएको छ । उसले चीनको नयाँ नामले सत्य परिवर्तन नहुने र अरुणाचल प्रदेश भारतको अभिन्न अङ्ग भएको बताएको छ ।

चीनको सरकारी अखबार ‘ग्लोबल टाइम्स’ को रिपोर्टमा चीनको नागरिक मामिला मन्त्रालयले जाङ्गन (चीनको अरुणाचल प्रदेशको नयाँ नाम) मा ३० स्थानको नयाँ नाम जारी गरेको बताइएको छ। सन् २०१७ मा चीनले अरुणाचल प्रदेशको नयाँ नामहरूको पहिलो सूची जारी गरेको थियो। जसमा ६ वटा नयाँ नाम समावेश भएका थिए ।

सन् २०२१ मा १५ स्थानको नयाँ नाम दिइएको थियो। त्यस्तै २०२३ मा ११ नयाँ नामहरूको सूची जारी गरिएको थियो।

हालै चीनले भारतीय प्रधानमन्त्री नरेन्द्र मोदीको अरुणाचल प्रदेश भ्रमणमा आपत्ति जनाएको थियो । त्यहाँ प्रधानमन्त्रीले सेनासँग सम्बन्धित केही आयोजनाको उद्घाटन गरेका थिए ।

चीनले यस विषयमा आपत्ति जनाएपछि भारतले यसको जवाफ दिएको थियो । विदेश मन्त्रालयले अरुणाचल प्रदेश भारतको अभिन्न अङ्ग भएको बताएको थियो।

Ratopati