काठमाडौं-– नेपाली कांग्रेसले राष्ट्रियसभाको अधिवेशन बोलाउन माग गरेको छ । यो मागसहित कांग्रेसले राष्ट्रियसभाका अध्यक्ष नारायणप्रसाद दाहालको ध्यानाकर्षण गराएको छ । कांग्रेस संसदीय दललले आइतबार (पुस १३) अध्यक्ष दाहालको ध्यानाकर्षण गराएको हो ।
राष्ट्रियसभामा कांग्रेस संसदीय दलका प्रमुख सचेतक कृष्णबहादुर रोकायको नेतृत्वमा गएको टोलीले आफ्नो निर्णय जानकारी गराउँदै अधिवेशनको माग गरेको थियो । कांग्रेसले यसअघि राष्ट्रियसभा अधिवेशन माग गर्दै विज्ञप्ति जारी गरेको थियो ।
यही पुस १० गते बसेको कांग्रेस संसदीय दलको बैठकबाट ‘देशको विषम परिस्थितिमा असंवैधानिक ढंगबाट प्रतिनिधिसभा विघटन भएको अवस्थामा जनताका आवाजहरू उठाउने सार्वभौम संघीय संसद्अन्तर्गत राष्ट्रियसभा मात्र कायम रहेको हुँदा राष्ट्रियसभाको बैठक बस्न आवश्यक भएकोले अविलम्ब राष्ट्रियसभाको अधिवेशन आह्वान गर्न माग गर्ने’ निर्णय गरिएको थियो ।
PSF
यही निर्णयको जानकारीसहित अधिवेशनका निम्ति पहल लिन अध्यक्ष दाहालको ध्यानाकर्षण गराइएको प्रमुख सचेतक रोकायले जानकारी दिए ।
आइतबार अध्यक्ष दाहालसँगको भेटमा कमला पन्त, किरणबाबु श्रेष्ठ, विष्णु सापकोटा, पदम परियारलगायत राष्ट्रियसभा सदस्य सहभागी थिए ।
