सवारी दुर्घटनामा दुई जनाको मृत्यु

काठमाडौं, २९ पुस

मकवानपुर, बाग्मती गाउँपालिका-७ लामिटारमा बा.प्र.०३-००३ प ७२०७ नम्बरको मोटरसाइकलको ठक्करबाट पैदलयात्री सोही ठाउँ बस्ने ४७ वर्षीय सिन्ताङ साईलाको मृत्यु भएको छ । बिहीबार राति मोटरसाइकलले ठक्कर दिँदा गम्भीर घाइते भएका उनको हेटौंडा चुरेहिल अस्पताल हुँदै पुरानो मेडिकल कलेज भरतपुरमा उपचारको क्रममा शुक्रबार दिउँसो मृत्यु भएको हो ।

चितवन, रत्ननगर नगरपालिका-१२ जमुनापुरमा ना.४२ प ४४५३ नम्बरको मोटरसाइकल र ना. ४ ख ५३०१ नम्बरको मिनि ट्रक एक-आपसमा ठक्कर खाई शुक्रबार दिउँसो दुर्घटना हुँदा मोटरसाइकल चालक सोही नगरपालिका-१० बस्ने २२ वर्षीय अमित महतोको घटनास्थलमै मृत्यु भएको छ । साथै दुर्घटनामा घाइते भएका मोटरसाइकलमा सवार १ जनाको पुरानो मेडिकल कलेज भरतपुरमा उपचार भइरहेको छ । दुवै सवारी साधन र मिनि ट्रक चालकलाई प्रहरीले नियन्त्रणमा लिएको छ ।  

दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।