काठमाडौं – बंगलादेशको राजधानी ढाकाबाट पाकिस्तानको कराँचीस्थित जिन्ना अन्तर्राष्ट्रिय विमानस्थलका लागि १४ वर्षपछि पहिलोपटक सिधा उडान सुरु भएको छ ।
यो सँगै दुई देशबीचको हवाई सम्पर्क पुनः स्थापित भएको छ । पाकिस्तान विमानस्थल प्राधिकरणका अनुसार, विमान बंगलादेश एयरलाइन्सको उडान नम्बर बीजी–३४१ बिहीबार साँझ कराँची अवतरण गरेको हो ।
जिन्ना अन्तर्राष्ट्रिय विमानस्थलमा अवतरण गरेको उक्त ऐतिहासिक उडानलाई परम्परागत ‘वाटर स्याल्युट’ दिएर भव्य स्वागत गरियो । १४ वर्षपछि ढाकाबाट कराँची पुगेको यो पहिलो व्यावसायिक उडान हो ।
यस उडान बहालीलाई पाकिस्तान र बंगलादेशबीच बढ्दो मैत्रीपूर्ण सम्बन्धको प्रतीकका रूपमा हेरिएको छ । एयरलाइन्सले जारी गरेको तालिका अनुसार उडान हप्ताको दुईपटक (बिहीबार र शनिबार) सञ्चालन हुनेछ ।
दुवै देशका सरकारले व्यापारिक र कुटनीतिक सम्बन्ध मजबुत बनाउने उद्देश्यले गत वर्षदेखि नै सिधा उडानका लागि छलफल गरिरहेका थिए ।
सन् १९७१ मा बंगलादेशले पाकिस्तानबाट स्वतन्त्रता प्राप्त गरेपछि दुई देशबीचको सम्बन्धमा विभिन्न उतारचढाव आउने गरेका छन् । यस सन्दर्भमा यो उडान सुचारु हुनुलाई एक महत्वपूर्ण ऐतिहासिक घटना मानिएको छ ।
सन् २०२५ को अगस्टमा पाकिस्तानी उपप्रधानमन्त्री तथा विदेशमन्त्री इशाक दारको ढाका भ्रमणका क्रममा पहिलो पटक यो योजना सार्वजनिक गरिएको थियो ।
पाकिस्तान नागरिक उड्डयन प्राधिकरणले विमान बंगलादेशलाई आफ्नो हवाई क्षेत्र र निर्धारित ‘एयर कोरिडोर’ प्रयोग गर्न अनुमति दिएसँगै यो सम्भव भएको हो ।
