काठमाडौँ–पछिल्ला वर्षहरूमा राजधानी काठमाडौँलगायत प्रमुख शहर र पर्यटकीय गन्तव्यहरुमा ठूलो लगानीमा पाँचतारे स्तरका होटल तथा रिसोर्ट खुल्ने क्रम बढेको छ। होटल तथा रिसोर्टमा बैंक तथा वित्तीय संस्थाका साथै उद्योगी व्यवसायीले लगानी बढाउँदै गएका छन्।यसैबीच भक्तपुरको पर्यटीय क्षेत्र नगरकोटमा चारतारे नयाँ होटल थपिने भएको छ। निजी लगानीमा निगालो होटल्स लिमिटेडको निर्माण भइरहेको छ। होटल पूर्वाधार निर्माण अन्तिम चरणमा पुगेको छ। हालसम्म ९५ प्रतिशत भौतिक प्रगति भएको निगालो होटल्सले जनाएको छ। अब पाँच प्रतिशत मात्र काम बाँकी छ।
आउँदो मार्चसम्म होटलको १५ कोठा सञ्चालनमा ल्याउने योजना निगालोको छ। होटल बनाउन भने केही फिनिसिङ काम मात्र बाँकी छ। आउँदो मार्च सम्ममा १५ कोठासहितको निर्माण गरेर ‘सफ्ट लन्च’ पूरा गर्ने र जुलाईबाट पूर्ण व्यावसायिक सञ्चालन हुने अपेक्षा गरिएको छ। होटलमा विभिन्न सुविधासहितका ६८ कोठा हुनेछन्।
होटल बनाउन एक अर्ब ३६ करोड ८० लाख रुर्पैयाँ लाग्ने अनुमान गरिएको छ। होटलमा ९० करोड रुपैयाँ बैंकको ऋण लगानी छ। ६५ प्रतिशत बैंकको ऋण र ३५ प्रतिशत स्वपुँजी (इक्विटी) हुने गरी लगानी संरचना बनाइएको छ। होटलले पुँजी जुटाउन प्राथमिक सेयर (आईपीओ) जारी गर्ने योजना बनाएको छ।
नेपालको धेरै होटलहरु सञ्चालन भइरहेकाले प्रतिस्पर्धात्मक दबाबको सामना गरिरहेको छ। निजी लगानीकर्ता र सरकार दुवैले नेपालको पर्यटन क्षेत्रको विकासलाई प्राथमिकता दिइरहेकाले समयसँगै प्रतिस्पर्धा पनि तीव्र हुने अपेक्षा गरिएको छ। आपूर्तिको तुलनामा मागमा अपेक्षाकृत ढिलो वृद्धि भएको कारणले गर्दा यस क्षेत्रमा प्रतिस्पर्धा पनि तीव्र भएको छ।
निगालो होटल सन् २०१८ मा स्थापना भएको हो। आईपीओमा जान पब्लिक लिमिटेडमा परिणत भएको छ। होटल संरचना ८० हजार वर्गमिटर क्षेत्रफलमा फैलिएको छ। त्रिभुवन विमानस्थलबाट २७ किलोमिटरको दूरीमा होटल रहेको छ। नेपाल राष्ट्र बैंकले पर्यटन क्षेत्रमा न्यूनतम १० प्रतिशत लगानी गर्नुपर्ने बाध्यात्मक व्यवस्थाले गर्दा पनि होटलमा लगानी बढेको हो। राष्ट्र बैंकका अनुसार होटल तथा रिसोर्टलगायत अन्य पर्यटन क्षेत्रमा बैंक तथा वित्तीय संस्थाहरूले दुई खर्ब ४८ अर्ब ६९ करोड रुपैयाँ लगानी गरेका छन्।
जसमध्ये होटलमा मात्रै दुई खर्ब १९ अर्ब, ट्रेकिङ, ट्राभल, रिसोर्ट, माउन्टेनियरिङ र र्याफ्टिङमा कूल २९ अर्ब ७० करोड रुपैयाँ लगानी भएको छ। पछिल्लो समयमा मात्रै सात अर्ब ७६ करोड रुपैयाँ लगानी होटलमा थपिएको छ। होटल, रिसोर्ट, रेस्टुराँमा वा पार्टी प्यालेसमा एकै पटकमा २२ लाख मानिसहरूलाई खाना खुवाउन सक्ने क्षमता छ।
होटल एसोसियसन नेपाल (हान) का अनुसार वार्षिक ३५ लाख पर्यटकहरूलाई सेवा दिनसक्ने गरी होटलहरू बिस्तार भइसकेका छन्। तर, ११ लाख पर्यटक मात्रै आउँदा औसतमा ४० प्रतिशत कोठाहरू मात्रै प्रयोगमा आएको हानको तथ्यांकले देखाएको छ।
