अवैध सुन तस्करी प्रकरण ५ वटा डमी कम्पनीबाट ३२ क्विन्टल सुन तस्करी

काठमाडौं । ब्रेक सू र अन्य इलेक्ट्रिक समानमा राखेर गरिएको ६० किलो सुन तस्करीमा जिल्ला सरकारी वकिल कार्यालयले थप ६० जनालाई प्रतिवादी बनाएर मुद्दा दायर गरेको छ । ६० किलो सुन तस्करी प्रकरणमा दोस्रो चरणको अनुसन्धानपछि प्रहरीले २ खर्ब ६६ अर्ब ६७ करोड ९ लाख रूपैयाँ बिगो दाबी गरेको छ । नेपाल प्रहरीको केन्द्रीय अनुसन्धान ब्युरो (सीआईबी)ले गरेको अनुसन्धानको आधारमा सरकारी वकिलको कार्यालयले मुद्दा दायर गरेको हो ।

नेपाल प्रहरीको केन्द्रीय अनुसन्धान ब्यूरो (सीआईबी)ले २ खर्ब ६६ अर्ब ६७ करोड ९ लाख ९ हजार ३०८ रुपैयाँ माग दाबी गरेकोमा भन्सार ऐन तर्फ ३० अर्ब ८४ करोड १२ लाख २६ हजार ४४० रुपैयाँ, क्रिप्टो करेन्सी तर्फ १ खर्ब ४९ अर्ब ६८ करोड २८ लाख ७ हजार ८८६ रुपैयाँ, नेपाल राष्ट्र बैंक ऐन तर्फ ८६ अर्ब १४ करोड ६८ लाख ७४ हजार ९८२ रुपैयाँ, पेवेल प्रालिलाई ६१ अर्ब ५० करोड २७ लाख ९ हजार २३३ रुपैयाँ र सजिलो पे पेमेन्ट सर्भिसेजलाई १९ अर्ब ४६ करोड २५ लाख ७३ हजार ७८५ रुपैयाँ तथा अन्य प्रतिवादीलाई ५ अर्ब १८ करोड १५ लाख ९१ हजार ९६४ रुपैयाँ मागदाबी गरिएको छ । विभिन्न डमी कम्पनीका नाममा पैठारी भइ आएका माल वस्तुहरूको परीक्षण गर्दा ती पार्ट पुर्जामा भएको सुनको तौल ३ हजार १ सय ९४ केजीभन्दा बढीको भएको देखिन आएको अभियोग पत्रमा उल्लेख छ । यसरी बरामद भएको अवैध सुनको मूल्य ३० अर्ब ८४ करोड बिगो र त्यति नै जरिबाना दाबी अभियोग पत्रमा गरिएको छ ।

यस प्रकरणमा २० जना पक्राउ परेका छन् । २६ जना अझै फरार छन् । सीआईबीले गरेको अनुसन्धानबाट पक्राउ परेका सिद्धार्थ भनिने २० वर्षीय सिद्धनाथ अशोक गायकवाड भारतको महाराष्ट्रका नागरिक हुन् ।उनले काठमाडौं महानगरपालिका–२२ न्यूरोडको संकटामा सुन रिफाईनरी पसल सञ्चालन गर्ने गरेका थिए । उनी वैशाख २३ गते पक्राउ परेका हुन् । उनले अवैध सुन खरिद गर्ने, गाल्ने, पगाल्ने र बिक्री गर्ने काम गर्दै आएका थिए । साम भनिने चिनियाँ नागरिक जोङ चियाङ्कहुआनबाट उनले अवैध सुन खरिद गरी बिक्री गर्ने गरेको पाइएको छ ।ब्रेक सु र इलेक्ट्रोनिक सामानमा लुकाएर ३२ क्विन्टल सुन तस्करी भएको निष्कर्ष प्रहरीले निकालेको छ ।केन्द्रीय अनुसन्धान ब्यूरो (सीआईबी)ले गरेको थप अनुसन्धानका क्रममा ३ हजार १९४.६६८ केजी सुन तस्करी भएको पाइएको हो । यसमध्ये ३६२.७७८ केजी ब्रेक सुमा लुकाएर र बाँकी अरु २ हजार ८३१.८९ केजी सुन पानी तान्ने मोटर लगायतका इलेक्ट्रोनिक सामानमा लुकाएर तस्करी गरेको पाइएको छ । अवैध सुन चोरी पैठारीमा संलग्न व्यक्तिहरूले स्थापना गरेका ७ वटा विभिन्न डमी कम्पनीहरू मध्ये ५ वटा डमी कम्पनीबाट विभिन्न इलेकट्रोनिक मालवस्तु तथा ब्रेक सुमा गरी कुल ३ हजार १९४.६६८ केजी अवैध सुन चोरी पैठारी गरेको देखिएको छ ।

सीआईबीका अनुसार भुजेल इलेक्ट्रिक्स सप्लायर्स प्रालीमार्फत १३०३.९६५ केजी, ह्वादा इलेक्ट्रिक सप्लायर्स प्रालीमार्फत ६३२.७१५ केजी, चुनगाक इलेक्ट्रिक सप्लायर्स प्रालीमार्फत ७१६.८३ केजीबाट सुन तस्करी गरेर भित्र्याइएको हो।यस्तै दोलखा इलेक्ट्रिक सप्लायर्समार्फत १७२.८ केजी र रेडी ट्रेड प्रालीमार्फत ७.५ केजी सुन तस्करी भएको पाइएको छ। ब्रेक सुमार्फत यसअघि ३६२.७७८ केजी सुन तस्करी भएको दाबी गरिएको थियो।सुन तस्करी गर्नकै लागि यी कम्पनी खोलिएको र सामान भित्र लुकाएर सुन ल्याइएको दाबी सीआईबीको छ। सीआईबीका अनुसार गिरोहले करिब ३१ अर्ब रुपैयाँको सुन तस्करी गरेर भित्र्याएका छन्।यसको हालको मूल्य ३० अर्ब ८२ करोड २२ लाखभन्दा बढी पर्छ । २०८० साउन २ मा ब्रेक सुमा लुकाएर ल्याएको ६० किलोभन्दा बढी सुन विमानस्थलमा बरामद भएको थियो । यो समूहले तस्करी गरेको कुल सुनको हालको बजार मूल्य ३० अर्ब ८२ करोड २२ लाख ९१ हजार २७२ रुपैयाँ बराबर भएको सीआईबीले जनाएको छ ।२ साउन २०८० मा ब्रेक सुमा लुकाएर ल्याएको ६० किलोभन्दा बढी सुन विमानस्थलमा बरामद भएको थियो । अनुसन्धानका क्रममा टोखा लगायतका स्थानमा सुन गाल्ने मेसिन भेटिएको थियो । २६२.७७८ किलो सुन तस्करी भएको निष्कर्षसहित प्रहरीले असोज ३१ मा २४ जनाविरुद्ध मुद्दा दायर गरेको थियो ।