काठमाडाैँ–उत्तर कोरियाली सर्वोच्च नेता किम जोङ उनले आफ्नी छोरी किम जु एलाई आफ्नो राजनीतिक उत्तराधिकारी चयन गरेका छन्। दक्षिण कोरियाको गुप्तचर निकाय नेसनल इन्टेलिजेन्स सर्भिस (एनआईएस) ले बिहीबार त्यहाँका सांसदहरूलाई यस बारे जानकारी गराएको हो।
करिब १३ वर्ष पुगेकी विश्वास गरिएकी जु एले पछिल्ला महिनाहरूमा आफ्ना पितासँगै विभिन्न उच्चस्तरीय र महत्त्वपूर्ण कार्यक्रमहरूमा उपस्थिति जनाउन थालेपछि यस्तो आकलन गरिएको हो। एनआईएसका अनुसार जु ए अहिले तालिम लिने चरणबाट अघि बढेर उत्तराधिकारी चयनको आधिकारिक चरणमा पुगेकी छिन् ।
कोरियाली जनसेनाको स्थापना दिवस र कुम्सुसान प्यालेस अफ द सन जस्ता महत्त्वपूर्ण भ्रमणहरूमा उनको सक्रिय सहभागिताले यसलाई पुष्टि गर्छ। दक्षिण कोरियाली सांसद ली सोङ–क्वेनका अनुसार जु एले केही राज्य नीतिहरूमा आफ्नो धारणा समेत राख्न थालेको संकेत पाइएपछि उनी उत्तराधिकारीको रूपमा अघि बढेको निष्कर्ष निकालिएको हो।
