गीतकार डा. दामोदर रेग्मी तथा गायिका आनी छोइङ् डोल्माको स्वरमा ‘जिन्दगीको पाठशाला’ गीत सार्वजनिक

काठमाडौं- ‘फूलको आँखामा फूलै संसार…’ पछि गायिका आनी छोइङ डोल्माको नयाँ गीत ‘पाठशाला…’ दर्शक तथा स्रोतामाझ आएको छ । यो गीतको म्युजिक भिडियो केही दिनअघि सार्वजनिक भएको छ । गीतकार डा. दामोदर रेग्मीको शब्द रचनाको यो गीतलाई कृति न्यौपानेले संगीतबद्ध गरेका छन् ।

गीतमा पुरुषोत्तम सुवेदीको संगीत संयोजन, किशोर थापाको मिक्सिङ–मास्टरिङ तथा राकेश श्रेष्ठको रेकर्डिङ रहेको छ । यो गीतको भिडियोमा अभिनेत्री मिथिला शर्माको जीवन्त अभिनय हेर्न सकिन्छ । कृष्णदेव रुपाखेतीद्वारा निर्देशित यो भिडियोले एउटा छुट्टै महत्व पनि बोकेको छ । उक्त गीतको म्युजिक भिडियो काठमाडौंको दरबार हाइस्कुल, भानुभक्त मावि तथा कीर्तिपुरको पुष्प सदन माविमासहित स्वयम्भूमा पनि छायांकन गरिएको छ ।

गायिका आनीलाई पनि आफ्नो किसिमको गीत गाउन पाउँदा र यो भिडियो हेर्दा एकदमै राम्रो बनेकोमा निर्देशक रुपाखेतीलाई धन्यवाद व्यक्त गरेकी छिन् । भिडियोमा उत्सव दाहालको छायाङ्कन तथा मीन रावलको सम्पादन रहेको छ । भिडियोमा मिथिला शर्मासंगै राकेश खड्का, डा. मनिषा आचार्य आदिले पनि अभिनय गरेका छन् । यो भिडियो ओएसआर डिजिटलमार्फत सार्वजनिक भएको छ ।