नेविसंघले माग्यो त्रिविका उपकुलपति बरालको राजीनामा

काठमाडौँ । नेपाल विद्यार्थी संघ (नेविसंघ) ले त्रिभुवन विश्वविद्यालयका उपकुलपति प्राडा केशरजंग बरालको राजीनामा माग गरेको छ। उपकुलपतिको ढोकामा नेविसंघले उपकुलपतिको राजीनामा माग गरेको पर्चा टासेको हो ।

उपकुलपति बरालसहित, रेक्टर प्राडा खड्क केसी र रजिस्ट्रार प्राडा केदारप्रसाद रिजालको राजीनामा माग गरेको हो। मेरिटोक्रेसी भन्ने तर, भित्रभित्रै पार्टीको नेताले जे–जे भन्यो त्यही अनुसार नियुक्त गरेको नेविसंघ त्रिवि सभापति विष्णु बडैलाले बताए ।
क्याम्पस प्रमुखमा कसलाई कति नम्बर दिइयो त्यो समेत खुलाइएकोले सांकेतिक रूपमा झकझकाएको उनको भनाइ छ। विद्यार्थीले ढोकामा पर्चा टाँस्ने समयमा उपकुलपति बराल भने कार्यकक्षमा अनुपस्थित थिए। डीन, क्याम्पस प्रमुख लगायतको नियुक्तिमा विद्यार्थी संगठनहरूले आपत्ति जनाउँदै आएका छन् ।
मेरिटोक्रेसीको नाममा दलका कार्यकर्तालाई नियुक्ति दिने गरेको भन्दै उनीहरूले आपत्ति जनाउँदै आएका हुन्।