वाफ महिला च्याम्पियनसिप : नेपालकाे लगातार दाेस्राे जित, इराकविरुद्ध सावित्राको ५ गोल

काठमाडौं । पश्चिम एसियन फुटबल फेडेरेसन महिला च्याम्पियनसिप (वाफ) मा नेपालले लगातार दाेस्राे जित हात पारेकाे छ ।
साउदी अरेबियाको किंग अब्दुल्लाह स्पोर्ट्स सिटीमा बिहीबार भएकाे खेलमा सावित्रा भण्डारीकाे कीर्तिमानी प्रदर्शनमा इराकलाई ५-० ले हराउँदै नेपालले लगातार दाेस्राे जित हात पारेकाे हाे ।
नेपालकाे जितमा ५ वटै गाेल सावित्राले गरिन् । सावित्राले खेलको १४, १६ र ३७ मिनेटमा गोल गर्दै ह्याट्रिक पूरा गरिन् । ४४ मिनेटमा चौथो र ७९ मिनेटमा पाँचौ गोल गरिन् । याेसँगै उनले नेपालका लागि ५० अन्तर्राष्ट्रिय गोल समेत पूरा गरेकि छिन् ।
नेपालले यसअघि पहिलो खेलमा सिरियालाई ४-१ गाेल अन्तरले हराएको थियो । लगातार दुई खेल जित्दै ६ अंक जोडेकाे नेपाल अंक तालिकाकाे शीर्ष स्थानमा छ।