पाण्डेको ‘ती नयन सराबी’ सार्वजनिक

ललितपुर । चर्चित गीतकार त्रिविक्रम पाण्डेको नयाँ गीत ती नयन सराबीको श्रव्यदृश्य (भिडियो) एक समारोहका बीच सार्वजनिक गरिएको छ। ललितपुरस्थित कर्मचारी सञ्चय कोषको सभाहलमा भएको सो समारोहमा वरिष्ठ संगीतकार दीपक जंगमले ती नयन सराबी गीतको श्रव्यदृश्य सार्वजनिक गरेका हुन् ।
सार्वजनिकीपछि बोल्दै संगीतकार जंगमले सुन्दर ढङ्गले लेखिएको गीतले राम्रो स्वर र संगीत पाएको बताए भने गीतकार पाण्डेले गीतमा भावुकताका साथै मानवीय भावना र विषयको प्रस्तुति सरल होस् भन्नेतर्फ पनि ध्यान दिएको बताए ।
कार्यक्रममा वरिष्ठ कलाकार मदनकृष्ण श्रेष्ठले गीतको भाव र संगीत आफूलाई मन परेको बताए ।
फैलियो माया दूबोसरी जस्ता चर्चित गीतका गीतकार पाण्डेको उक्त गीतमा संगीत हरिशरण सायमीले दिएका छन् भने वरिष्ठ कलाकार मदनकृष्ण श्रेष्ठले स्वर दिएका छन् ।
नेपाल राष्ट्रिय कर्मचारी संगठनद्धारा आयोजित सो कार्यक्रम राजाराम गौतमको सभापतित्वमा भएको थियो ।