पश्चिम बंगालमा भाजपा नेता राजु झाको गोली हानी हत्या

भारतीय जनता पार्टीका नेता तथा कोइला व्यवसायी राजु झाको पश्चिम बंगालको पूर्वी बर्दवान जिल्लामा हत्या गरिएको छ । हत्यामा प्रयोग भएको निलो रङ्गको कार आइतबार बिहान प्रहरीले बरामद गरेको छ ।

यद्यपि, गाडीको नम्बर प्लेट नक्कली छ । राजु झामाथि गोली प्रहार गर्नेहरू यही गाडीमा रहेको दाबी गरिएको छ । एक प्रहरी अधिकारीले यो जानकारी दिएका हुन् ।

राजु झामाथि शनिवार राति करिब आठ बजे राजमार्ग छेउमा रहेको शक्तिगढमा निलो रङ्गको कारमा सवार अज्ञात आक्रमणकारीले गोली प्रहार गरेका थिए ।राजु झालाई अस्पताल लैजाने क्रममा मृत घोषणा गरिएको थियो । त्यसपछि आक्रमणकारी कार त्यहीँ छोडेर भागेको प्रहरीको अनुमान छ ।

राजुको कार शक्तिगढस्थित मिठाई पसल अगाडि पार्किङ गरिएको प्रत्यक्षदर्शीले बताए ।

त्यही क्रममा नीलो रङ्गको कारमा रहेका मानिसहरूले अन्धाधुन्ध गोली चलाउन थाले र हतारमा कोलकातातर्फ लागे ।

आक्रमणपछि यसमा सवार आरोपीले कारलाई त्यहीँ छाडेर रेल चढेर कोलकातातर्फ लागेका हुन सक्ने प्रहरीले जनाएको छ । पहिला उनीहरू हत्यापछि सडक मार्ग हुँदै कोलकाता जाने तयारीमा थिए । तर ठाउँ–ठाउँमा नाका चेकिङका कारण उनीहरुले आफ्नो उद्देश्य बदलेको अनुमान गरिएको छ ।

प्रहरीका अनुसार यो गाडी आइतबार बिहान स्टेसन जाने बाटोमा अलपत्र अवस्थामा फेला परेको हो ।

प्रहरीले कारबाट केही बोतल रक्सी समेत बरामद गरेको छ । प्रहरीले आक्रमणकारीको खोजी गरिरहेको छ ।

यसैबीच, तृणमूल कांग्रेसका विधायक बाबुल सुप्रियोले अब भाजपाका पूर्व प्रदेश अध्यक्ष दिलीप घोषलाई निशाना साँध्दै राजुका कारण नै पार्टीका शीर्ष नेतासँग उनको (बाबुलको) मतभेद सुरु भएको बताए ।

उनले दिलीप र कैलाश विजयवर्गीयले राजुलाई पार्टीमा ल्याएको दाबी गरेका छन् ।