चितवनमा स्कुल बसमा आगजनी

चितवन । चितवनको भरतपुर-२० मा आइतबार बिहान अज्ञात समूहले विद्यार्थी लिन हिँडेको ‘स्मल हेभन स्कुल’को बसमा आगजनी गरेका छन् ।

तीनवटा मोटरसाइकलमा आएका ६ जनाको समूहले बसमा पेट्रोल छर्किएर आगो लगाएका हुन् । उनीहरु सबै जना फरार छन् । बस जलेर पूर्ण रुपमा क्षति भएको छ । जिल्ला प्रहरी कार्यालय चितवनले घटना बारे अनुसन्धान भइरहेको जनाएको छ । विद्यालयले दिएको जानकारी अनुसार चनौली, द्रद्रेनी, शुक्रनगर पटिहानी हुँदै विद्यार्थी लिन गएको बागमती प्रदेश ०६ ००१ क ००४५ नम्बरको बसमा आगजनी भएको हो ।