आज सुखानी स्मृति दिवस अर्थात् सुखानीमा कम्युनिष्ट योद्धाको हत्या गरिएको दिन

काठमाडौं । आज फागुन २१ अर्थात् सुखानीमा कम्युनिष्ट योद्धाको हत्या गरिएको दिन ।  २०२९ साल फागुन २१ गते पञ्चायत विरुद्धको आन्दोलनमा लागेका पाँच जना योद्धालाई पञ्चायतका क्रूर शासकले जेल सार्ने नाममा सुखानीको जंगलमा लगी हत्या गरेका थिए ।

पूर्वी नेपालमा २०२८ सालमा नेपाल कम्युनिष्ट पार्टीले झापा जिल्लामा वर्ग शत्रु खत्तम अभियान सुरु गरेको थियो । २०२८ सालमा झापामा कम्युनिष्टको नेतृत्वमा केही सामन्तहरू काटिएका आरोपमा कम्युनिष्ट नेताहरू पक्राउ परेका थिए । कम्युनिष्ट आन्दोलनलाई कमजोर पार्न कम्युनिष्ट नेताहरू पक्राउ गरिएको भए पनि पूर्वी नेपालमा कम्युनिष्ट आन्दोलन अझ चर्किएको थियो ।

त्यसबाट डराएका पञ्चायत शासकले झापाको चन्द्रगढी जेलमा रहेका कम्युनिष्ट नेताहरू रामनाथ दाहाल, नेत्र घिमिरे, कृष्ण कुइँकेल, बिरेन राजवंशी र नारायण श्रेष्ठलाई २०२९ साल फागुन २१ गते राति इलाम जेल सरुवा गर्ने भनी जेलबाट निकालेर झापाको खुदुनाबारीाको सुखानी जंगलमा पुर्‍याएर गोली हानी हत्या गरेका थिए ।

उहाँहरूको स्मृति झापामा सुखानी सहिद स्मृति प्रतिष्ठान स्थापना भएको छ । सो प्रतिष्ठानले हालको अर्जुनधारा नगरपालिकाको वडा नं ९ र ११ को २४ दशमलव ६ हेक्टर जमिनमा सुखानी सहिद स्मृति पार्क निर्माण गरेको छ । २०५८ सालदेखि निर्माण सुरु गरिएको सो पार्कमा सहिदहरूको प्रतिमा राखिएको छ । त्यस्तै सिमसार क्षेत्रमा ड्याम बाँधेर पोखरी निर्माण गरिएको छ । सहिदहरू प्रति सम्मान जनाउन वार्षिक एक लाख बढी पर्यटक सुखानी पुग्ने गर्दछन् ।